鄭中基 x 黃子華 喜劇雙打

April 9, 2015 | 經濟日報

鄭中基在自導自演的《神秘寶藏》,邀來男神黃子華一同雙打,聯合主演。兩人喜劇風格南轅北轍,互相對碰,大家都想知效果係點,可是影片年底才上映,真係等到頸都長,幸兩人受訪率先透露箇中玄機,半正經半開玩笑又惺惺相惜,對談已頗精采。各位,睇住呀!

黃:黃子華  鄭:鄭中基
許:許維恩  記:記 者

進入歷史人物的記憶……

《神秘寶藏》尚有台灣藝人許維恩參演,在戲內她飾演科學家,因發明了可令人體DNA解碼後進入祖先記憶內的「意識轉移機器」,令終日夢想尋寶發達的張就(鄭中基飾)回到清朝。如果真的有意識轉移機器,究竟黃子華、鄭中基、許維恩最想進入誰的記憶?

黃:我當然想知道阿當諗咩嘢啦。

鄭:我想返回小學時啫。

記:有冇搞錯,咁嘥?

鄭:當年我有個好靚嘅筆盒,求咗屋企好耐先買到,但第一日返學就唔見咗,要去睇吓邊個偷。

許:要回高中時,因是很開心的日子。

鄭:可是他想問你回去哪位歷史人物身上。

黃:我哋真係冇咩大志。

許:回到凡爾賽宮,做公主。

黃:去斷頭台嘅年代。

記:咁大整蠱?但子華為何一去就去到阿當咁盡?

黃:阿當係見到上帝,同佢傾偈喎,上帝喎,你約嚟見吓吖。約巴菲特食餐要一百萬,李嘉誠都唔係人人約到,但我就約到上帝,咁可以問佢很多奧秘,仲可以問埋邊個偷咗阿基個筆盒呀?咩都知啦。

鄭:又係噃,咁我都要做阿當。

一切,因張保仔而起。《神秘寶藏》是齣穿越時空的尋寶喜劇,講現代人為寶藏,回到清朝尋張保仔。聽落似九唔搭八無厘頭,但事實唔係亂咁嚟,且導或演此片都有原因。

黃:對我嚟講,有幾個角色係男演員必接,就是哈姆雷特、溥儀及張保仔。所以,差不多係就算接咗先發現係只得隻舢舨,我都係㗎喇,何況呢隻唔係舢舨,係齣好大規模嘅製作,仲想點啫,好難唔做,除非唔做演員啦。

鄭:我細個係響西營盤讀書,睇歷史話,西營盤就係張保仔命名,係佢地盤嚟(註:此為其一說法,但存有爭議),於是成日懷疑佢仲有好多寶藏,咁就呢度掘吓果度掘吓。到長大,一直想拍佢,咁啱演《四大名捕》時同Gordon(陳嘉上)講起,點知原來佢在30幾年前於邵氏做道具時已諗住拍張保仔,但因為覺得呢個題材,船隊很緊要,可是太大規模拍唔到,但覺得現在有特技幫助終於可以拍到,於是我哋在兩、三年前開始籌備,陳嘉上話諗唔掂海戰點拍就唔開,因為很重要。所以今次能開拍已係奇迹,因要很龐大嘅資源,我哋要在有限錢內,猛咁諗點樣可以拍到,但好玩嘅地方又係響呢度。

合作當踢波

記:你們屬不同的喜劇風格,二人演出時如何協調?

黃:好簡單㗎咋,佢係導演,每一樣做完,然後問「導演得唔得」,就係咁。

鄭:梗係得啦。其實兩個不同喜劇風格,咪好囉,多啲嘢睇,大家當踢波,我交個波畀你,你又畀番我,其實仲好玩。

黃:佢真係好creative,咁我都算係幾creative,所以真係拍出嚟嘅嘢同劇本所寫係有唔同,真係撞咗好多嘢出嚟。

記:但此題材可用很多方式去處理,是否一開始已定調此片是喜劇?

鄭:其實我唔想嘅,但Gordon話你唔好啦。我唔係抗拒喜劇,但唔想係瘋狂惡搞,所以此片有幽默但唔係夾硬。有很多人以為我拍就梗係鄭中基自己演張保仔,但我係演殺手出嚟會畀觀眾笑,演打海戰場面冇說服力,而子華演正劇係好過我好多,佢拍打戲打到身水身汗,分分鐘要打格,佢一打交就「飛釘」,呢個情形我係好耐以前在舊電視劇版Batman見過。所以拍攝時我成日笑,佢問我笑咩,我話冇嘢。

記:子華接演前是否知道有那麼多動作戲份?有冇覺得中計?

黃:中計啦,見到有訓練基地就知中計。動作真係連打6、7個,練習時我仲話使唔使打咁多個呀,到時你都cut shot㗎啦,但原來拍時一shot落,發覺準備工夫係冇白費。

記:身體能否負荷?

黃:當時好能夠負荷到,但過後,隻右腳廢咗啦!仲有隻左腳,還可以拍多套。

鄭:有套戲叫《My Left Foot: The Story of Christy Brown》(無悔今生)嘛,咁呢套就叫《My Right Foot》。

黃:其實好玩,但我始終唔係武打演員,最主要係要喜劇出嚟嘅效果唔係夾硬,重要係個人物。張保仔係legend,就算用喜劇去演我哋嘅legend都唔可以搞到變咗第二樣嘢,希望大家感受到佢係喜劇人物之餘,同時仲係個海盜,佢響戲內冇打家劫舍啫,但唔好逼佢囉,我要做到呢樣感覺但又要好笑,係挑戰。

重視影像處理

記:子華在現場見到Ronald當導演,有否勾起導演癮?

黃:佢處理影像嘅嘢係比我強很多,我唔敢想像去拍呢個規模嘅戲。佢直頭係影癡嚟,有齊成套「架生」響屋企,試過哂喇,然後才搬嚟拍。

鄭:係,響屋企搵啲家人試囉。

黃:今次可以見到佢處理影像嘅能力,很多鏡頭好震撼,很多諗唔到點拍出氣勢嘅嘢佢諗到。第一日已有條威也由50米吊個攝影機過嚟,但只係拍我入一入office咋喎。

鄭:工作人員奇怪點解導演單有威也組,明明冇打交場面㗎。以前啲戲,我曾經有提議過咁拍……

黃:因為唔夠budget所以冇拍?

鄭:「黐綫,收工就走啦,阻住哂。」谷德昭成日咁講。

(《神秘寶藏》上映日期:10月)