吳君如棄靚女扮狗舐子華

2002.06.28 | TVB 周刊

君如貪靚就係人都知,就連佢自己都笑言本身係一個又演得又講得又聰明又搞笑仲要又瘦又靚嘅女人,真係冇乜人敢同佢比,可以令佢棄靚不要,佢咪係《一觸即發》嘅黃子華囉!話說君如與子華最近為美國票房No.1電影《狗狗震》廣東版配音,原本被安排做戲中「大胸靚女」的君如,竟然拒演靚女,主動要求配子華戲中的寵物狗,究竟子華有何魅力,可以吸引到君如有靚女唔做去做狗呢?

吳:吳君如  黃:黃子華

點解今次有靚女唔做扮狗?

吳:本來人哋叫我配個靚女,但係呢套戲隻狗先係主角,咪主動同佢哋講話配隻狗囉,況且隻狗唔係好多對白,只係成日舐主人,好多「si si sir sir」聲,我係屋企已經太多嘢講,吱吱喳喳,都係配隻狗舒服啲。

其實你配音經驗咁豐富,又配過猩猩,配狗仲有冇難度?

吳:都有㗎!始終都唔係配一個真實嘅人,我都要請教下一啲養狗嘅朋友,去揣摩狗嘅動靜,其實都幾難,更何況我本身都唔係好鍾意狗。

你哋兩個都咁搞笑,怕唔怕配音時互相笑到收唔到掣?

吳:唔會嘅!我哋好專業…其實平時我哋好嚴肅㗎!

黃:平時做嘢我哋好認真,唔係訪問我哋唔講笑㗎。

俊狗係戲入面成日舐主人,配音時如果幻想舐子華,你會點呢?

吳:冇問題呀,佢咁靚仔,加上依家又瘦哂,求之不得啦!

黃:被君如舐都冇所謂,仲完全歡迎添!不過我相信舐完之後會有好嚴重嘅後果。

吳:其實子華真係好似戲中嘅男主角,無論髮型、樣貌、動靜都好似,連講嘢嘅認真態度都係一模一樣。

黃:我都唔知自己係乜嘢人,所以我都唔知似唔似。低係套戲最吸引嘅地方係好多位都會令人唔知個角色係真人定卡通,好似一幕講隻狗食熱狗,當佢將隻熱狗食咗入口,我睇睇下都畀隻狗呃咗,以為佢真係狗,咁都做到真係好犀利。

你哋會唔會合作做啲搞笑騷?

吳:我好想同子華合作……

黃:唔係,係我想同佢合作至真,我已經有啲好實在嘅計劃,準備明年三月做完《棟篤笑》就會搵佢。

你哋咁樣互相吹捧對方係咪對對方嘅搞笑才能好有信心?

吳:我對佢好有信心,我由細睇到佢大……哈哈,我好鍾意佢,由第一次《棟篤笑》開始,場場都捧佢場,佢嘅搞笑才華真係不用置疑。

黃:我就唔係對君如搞笑好有信心,係對佢啲好有深度嘅嘢信心。

咁即係互相欣賞?

吳:唔係呀!係我欣賞佢咋!

黃:我唔係欣賞佢搞笑,但我欣賞佢嘅號召力。

後記

雖然佢哋話自己做嘢時好正經,但係睇佢哋做訪問時(包括同所有傳媒)都冇嚟正經,就知道記者手足畀佢哋笑死之餘,仲會畀佢哋激死。