【大家等咗幾耐?】子華神出年一次拍兩套戲 同灘叔合作拍喜劇

2016.12.17 | 蘋果日報

56歲男神黃子華棟篤笑受歡迎不在話下,舞台劇又係咁收得,電視劇又好收得,不過…電影上真係子華神嘅弱點,不過出年子華神再一次挑戰電影,仲要一次挑戰兩套!

噚日鄒凱光灘叔喺Instagram放咗張同子華神嘅合照,仲寫住「決定搞啲嘢!」講緊就係搵子華神拍戲,《蘋果》問過灘叔,佢接受電話訪問時話,係想同子華神合作拍搞笑戲,舒緩一下香港人沉鬱的氣氛,佢話:「有新計劃傾緊搞一個喜劇(電影)有啲諗法,噚日搵子華出嚟傾,初步佢係okay呀。」

不過講到劇本灘叔話未有,仲話可能套戲拍完都唔會有,呢啲咪香港特色囉。灘叔話電影構念未可以講住:「佢又話唔搞棟篤笑,因為唔知笑乜,我就話大家香港人,你咁搞笑我都搞搞地笑,大家應該做返啲好開心嘢氹返香港人笑返,呢個係我哋概念。覺得香港氣氛太差,做啲嘢令大家笑,咩類型戲唔講得住,但香港人會有共鳴,落手落腳梗係我,當然我會捉住佢傾同度,子華梗係做演員。」

而另一部是蕭定一為子華神度身訂造的《棟》片,並於明年開工,預計投資2千萬,蕭定一噚日喺電話回應:「故事係講子華演一個被英國遺棄特務,留低香港好潦倒,一個任務認識咗佘詩曼,後來阿佘做咗警務處長,但處處針對子華,搞到佢冇啖好食。」蕭定一指卡士仍考慮中:「子華會碌好多友情卡,佢啲朋友覺得呢套唔係子華『創業作』,就係『收山作』,大家都話嚟支持。」佘詩曼09年與子華合作無綫劇集《絕代商驕》,對於與子次大銀幕合作,阿佘昨短訊回應:「我都好開心,過完農曆年就開工啦,好期待再次同子華合作。」

1481902877_2bd4

1481902893_52ef

大家係唔係好期待呢?

1481902879_17b6

大家仲記唔記得呢套戲?《一蚊雞保鑣》啊!