拍劇感受男人最痛 黃子華揀埋鉸剪等閹

2004.10.23 | 太陽報

黃子華依家喺橫店拍緊劇集《九品芝麻官》,繼早前剃光頭上陣後,日前仲畀人監生捉咗去閹添!雖然擺到明係拍戲「揸流攤」,但話晒都係「男人最痛」,子華都算坎坷囉!難得佢亦豁出去,除咗同監製楊紹鴻一齊揀鉸剪外,仲笑淫淫同諸事姐講:「唔同刑具,適合唔同嘅硬度!」之後子華畀啲公公「夾」上刑床時,仲極速除衫擘髀迎接,似乎又幾Enjoy喎!
不過話晒呢場都係「床戲」,子華事前都做足準備工夫:「我一早着定睡衣,仲着多咗條底裙同孖煙囪,應該冇事。」子華講講吓發現有女記者在場,即時補多句:「早知有女士喺度,應該着埋單車褲,總之呢一剪就傷盡天下美少女嘅心啦!」提到同劇嘅黃聖依唔介意獻上螢幕初吻,子華竟然請對方食檸檬:「難度高啲喎!似乎羅家英機會大啲!」

e04102308_big

黃子華親自揀鉸剪,之後被四名太監捉去閹。