推出最後實體專輯反應好 農夫爆黃子華主動約食飯

2017.01.06 | 頭條日報

組合農夫近年拍劇、主持瓣瓣掂,在TVB台慶頒獎禮更同鄭裕玲(嘟姐)齊拎「最佳節目主持」,歌手出身的兩人拍電視劇同時堅持繼續做「音樂」,最近推出EP專輯《你而家無,但係將來會有(下集)》,受惠於聖誕、新年黃金檔期更要加單翻印,反應比預期中更好,C君(鄭詩君)開心說:「聽到呢個好消息開心過送層樓畀我,因為呢張係我哋告別實體唱片之作,對我哋嚟講意義重大。」

對於推出最後一隻實體唱片,陸永無不捨:「反而對黑膠唱片先有情意結,而且又唔係有唱片揸手先叫做係歌星,好多網絡轉載嘅音樂仲多人聽啦,我哋兩年先做一隻唱片,到時可能冇晒唱片。亦非因為冇錢賺所以唔出唱片,其實我哋自家製作成本好低,投放精神、時間會更加多,與其係咁不如快手快腳將作品推去網上平台同大家分享好過,網上平台冇限制空間做音樂仲自由,就算唔出唱片我哋都唔會停止做音樂。」

唔敢消費子華神
問到兩人可會送最後一隻唱片畀嘟姐?陸永即說:「唔係送唔送嘅問題,最尷尬係依家大部份人冇CD機,唔通用藍光機播放,喺電視機聽歌咩,真係要接受時代改變!」C君反而最想送畀「男神」黃子華:「其實佢好鍾意音樂,以前佢有夾Band,之前佢睇過我哋嘅Talk Show後約我哋食飯,佢話覺得我哋音樂好另類,好自由好好玩。(會唔會邀請佢一齊合作?) 暫時冇諗到合作喎,因為子華係我哋偶像,除非由佢提出啦,唔通我哋鍾意美斯,同佢提出組隊波咩!我哋唔會為合作而合作消費佢個名,真係創作咗一首歌啱佢就例外,或者可以一齊做吓Talk Show。」據知稍後子華開拍的新片預埋C君玩,而陸永因為有其他工作未能演出。

wnep098p01b

嘟姐同子華都係農夫嘅偶像,前者已合作無間,後者就希望未來可合作。