農夫發揚子華教誨 唔好講粗口

2018.11.13 | 蘋果日報

由陸永和C君組成的農夫前晚在旺角麥花臣場館繼續開騷,兩人得悉黃子華前來捧場,於開騷前的迎賓儀式上,邀請染了一頭白髮的子華上台,子華就拉好友羅金榮陪伴,農夫更向子華跪拜,卻遭子華講笑寸爆:「旺角最蠱惑嗰兩個人喺度!」

冇免費飛睇
C君問子華是否打算復出?他沒有回答,反而戮力幫老友賣廣告,問羅金榮:「你係咪出新歌?有乜宣傳就好做,冇免費飛你睇,我哋要講半個鐘頭先。」C君笑騎騎說:「係就好,我哋好做好多。」陸永亦附和:「我哋可以休息吓先。」子華聞言即大耍太極:「但我今日件衫唔係好襯,都係畀番時間你哋。」此時C君嗌着準備返回觀眾席的子華:「可唔可以影張相?」台下觀眾即起哄,子華就玩嘢回應:「不如大家一齊上台影啦,得我哋幾個咁冷清。」說罷即落台。
農夫在騷上再次提及於子華的慶功宴上,三人傾足數小時,C君更稱其教誨成為了主題:「子華最後一個騷,人生最後一個真理畀後輩,以後同人嗌交,千祈唔好講粗口。」陸永接着說:「嗌緊交嘅時候,如果一講粗口,你就錯,因為個重點會去咗粗口,而唔係講緊件事,你唔會記得當初嗌交嗌乜,總之其中一個人一講到老母,永遠就係老母老竇老味,跟住點收科?」

傾偈取靈感
完騷後農夫接受訪問,兩人表示:「休息四日後會再做三場,我哋做咗兩場,但今晚子華嚟睇,我哋仲緊張,因為好多嘢要記,嗰十幾分鐘棟篤笑環節係向佢致敬。」談到之前與子華吹水幾個鐘,農夫說:「都唔係第一次,平時約食飯都會傾好耐。」談到子華吹得,兩人異口同聲說:「佢唔係多口水,係多題目,同子華傾有靈感,我哋首歌《面斥不雅》都係因為子華而寫。」

13ec2p1e

子華(右二)被邀上台合照時,叫台下觀眾一齊影。