隔牆有耳:黃子華令剩女莊尖叫

2012.05.28 | 蘋果日報

陳淑莊處女下海嘅個人talk show《戴錯嘢夫人》噚日閉幕,連日捧場者除咗佢嘅一班粉絲,仲有棟篤笑鼻祖黃子華。 Tanya憶述當初知道神級人士都會嚟捧場,喺立法會開開吓會都即時walk out頓地尖叫。據知 Tanya籌辦處女騷時,都向子華兄請教過,估唔到佢直情現身捧場。八方聽聞黃子華年尾都會開騷,相信都會引起撲飛熱。
Tanya再踏台板叫座力依然,座上客嚟自唔同界別,包括林海峰、黃耀明、許鞍華、陳志雲、王菀之、前廣播處長張敏儀、立法會秘書長吳文華同副局長邱誠武等。據聞余若薇喺現場播出 Tanya舊年嘅區議會敗選感言時,更加哭成淚人。

28lp2p2n

Tanya(右)處女talk show獲得「神」級棟篤笑鼻祖黃子華(中)捧場。