35場舞台劇落幕 自嘲食禁藥 黃子華:用咗洪荒之力

2016.08.16 | 都市日報

黃子華同陳法拉合演的一連35場《前度》舞台劇,前晚終於順利完成最後一場,曲終人散。話晒辛苦咁耐,二人完騷後就拉大隊去慶功啦!子華透露暫時未有得休息住,要繼續拍廣告,稍後仲會拍電影,粉絲們有福啦!講到舞台劇能夠順利演出,佢好開心咁話:「呢35場我都用咗洪荒之力㗎!」估唔到子華忙於演出嘅同時,都可以追得咁貼,不愧為子華神呀!

黃子華宣布同陳法拉合作演出舞台劇《前度》時,即引起全城搶飛熱潮,令到舞台劇加場再加場,最後加到成35場,都咪話唔犀利!而話咁快前晚已經係最後一場,完騷後子華同法拉跟一眾台前幕後出席慶功宴,食番餐勁嘅!入食肆前,子華先接受傳媒訪問,佢表示完成演出後未有得休息,要還廣告債,又要同蕭定一合作拍喜劇電影,真係好忙呀!不過對於舞台劇能夠順利演出,子華即笑謂:「好開心,35場我都用咗洪荒之力㗎!中間病咗3日,食咗幾日藥。(食禁藥?)係呀,所以唔踩得單車、唔做得運動囉。」百忙之中都緊貼奧運消息,兼一個完美靚抽,真係抵子華被封為男神啦!

法拉返美讀書
至於法拉則透露一星期後就要返美國繼續讀書,其間亦會拍廣告賺學費,法拉笑言:「放寒假再返嚟,斷斷續續都會返嚟,要搵食嘛!」不過佢大爆今次回港做暑期工要多謝老闆子華,皆因單係舞台劇的演出就已經夠畀之後的學費,似乎賺唔少喎!而早前有傳無綫有意搵法拉回巢拍劇,佢坦言:「有搵經理人傾,但我冇接觸過,不過我都唔可以接時間太長嘅工作。」言下之意即係冇得睇法拉返娘家拍劇?

20160815233004ent2colwongchiwah2

雖然《前度》叫好又叫座,子華同法拉都異口同聲話唔會開Part 2。

20160815233006ent2colwongchiwaha

完騷後,子華着住浴袍同個舞台自拍。

20160815233007ent2colwongchiwah4

完成35場舞台劇,子華(左)同另一演員劉俊謙一齊開香檳慶祝啦!