奸得盡情自信後無來者 奸人誌 黃子華:擔心俾人掟雞蛋

2007年10月22日 | 蘋果日報

奸人誌 第一回
黃子華近日憑無綫劇集《奸人堅》,再次成為坊間師奶的家常話題,首次飾演奸角,子華笑言也擔心會被人掟雞蛋,但只要角色有趣,任何角色他都一定會演。由於向來甚少劇集以奸角為主角,子華揚言該劇播出後,將來相信也很難會有另一套以奸角作主線的劇集出現,因為他對《奸人堅》信心十足,可以做到後無來者。

近日黃子華在無綫播出的新劇《奸人堅》中,開拓了一條新戲路,飾演大壞蛋奸人堅,就連他自己也覺得這角色「賤到無倫」,但他也承認當初正是看中角色夠賤,才決定接拍。子華說:「其實當初我以為係嗰啲黃飛鴻同奸人堅對打嘅劇,點知睇埋劇本之後,都覺得真係賤到咁,到底得唔得㗎?我仲問監製係咪真係得㗎,不過我就覺得呢個角色好好玩,最想試吓觀眾對奸人堅嘅忍耐力。」

遺憾武打戲太少
由於黃子華甚少飾演奸角,他也坦言怕影響形象。子華說:「梗係擔心喇,我話晒都係一個靚仔嚟㗎嘛!不過希望電視觀眾睇完套劇可以理智少少,為免出街俾人掟雞蛋,所以我都決定近排去少啲街市。講真呢套劇之後,我相信 TVB好難會再去用奸角嚟擔正,因為真係好難平衡到。」

今次黃子華除奸得盡興外,也一嘗做打仔的心願,他說:「成套劇唔只打得辛苦,被打都好辛苦,總之就日日打,再唔係就整機關去害人,對於我嚟講如果個角色有趣,即使要打或者被打都冇問題,不過今次我唯一一樣覺得遺憾就係打唔夠,導演以為我唔打得,所以唔敢寫得太多畀我打。」

22ed5p1n

向來是收視保證的黃子華,絕對相信該劇一定大收,他自信地說:「總之你打開電視睇呢套劇,絕對唔會浪費你時間,不過我本身就真係唔會介意收視好唔好。」子華又笑言劇中除了奸到出汁的奸人堅外,林嘉華飾演的黃飛鴻也是前所未見,他說:「雖然大家以前都未合作過,不過林嘉華今次真係做得好好,佢真係做到黃飛鴻好戇居,其中有幕講佢同個女仔去拍拖,點知冇嘢玩之下仲戇居到耍洪拳,真係超爆笑。」

22ed5p4

子華在《奸人堅》中扮演大壞蛋,連他自己也笑言這角色「賤到無倫」。

現實裏沉默寡言
黃子華於1987年參加無綫電視舉辦的「全能司儀大賽」成功加入娛樂圈,但至1990年演出棟篤笑《娛樂圈血肉史》,才開始廣為人識,10多年間演出過多次棟篤笑均叫好叫座。至2000年他殺入電視圈,與鄭裕玲合演無綫劇集《男親女愛》收視高企,更憑余樂天一角奪得無綫「本年度我最喜愛的電視角色」獎;其後子華於2004年再憑另一劇集《棟篤神探》莫作棟一角,奪得同樣獎項,證明子華深受家庭觀眾歡迎。

平日在電視上或棟篤笑表演中所看到的黃子華,十分搞笑,更擅於搞氣氛,但原來現實生活中的他十分沉默,他說:「我私底下係一個靚仔,每次啲人見我第一次都話我唔係醜樣,而我本身真係比一般人靜好多,我平時嘅生活都係無言無語,有時都會畀人感覺我好悶,我最想一大班人嘅時候可以唔使我出聲,識得我耐嘅朋友都知我比較靜,我反而係一個鍾意聽人講嘢多過自己講嘢嘅人。」

22ed5p5

子華大讚拍檔林嘉華飾演的黃飛鴻前所未見,戇居得十分爆笑。

其實子華近日除積極宣傳《奸人堅》外,也忙於籌備今年12月舉行的棟篤笑《越大鑊越快樂》,問到第十次舉行棟篤笑的他將有何突破?他說:「次次都會有問呢個問題,但又唔會問唱歌嘅人有乜嘢突破,其實我每一次都會有新嘢,記得第一次做完棟篤笑之後,自己都覺得冇嘢可以再做第二個,做完第二個之後又會再咁諗,最有突破係以為自己冇料,原來係好有料嘅,其實今次喺題材上面會比較殘暴。」

做好本份冇壓力
問到門票銷售情況時,子華說:「我哋都已經屬於一個老字號,唔鍾意我嘅拉你入嚟都唔會入喇,係老朋友就自然會入嚟睇。」黃子華向來周身刀,早年更與友人夾 Band組成「哈痞樂隊」,由子華擔任主音,對於自己的多才多藝,子華笑言有一定壓力,問他平日如何減壓?他說:「冇㗎!有壓力即係有嘢仲未做好,咁唯一方法就係將件事做好佢,自然就唔會有壓力,簡單講句即係未解決要去解決咗先得。」

22ed5p3n

向來是收視保證的黃子華,坦言《奸人堅》一定大收,自信十足。