棟篤笑教主再戰江湖 黃子華一個人玩晒歡樂今宵

2006年9月24日 | 蘋果日報

黃子華是首個將「Stand-up Comedy」繙譯成「棟篤笑」的人,中國早於清代已經出現類似棟篤笑的表演,稱之為「相聲」。在外國有很多喜劇演員,單獨演繹連續、快速的短篇笑話,被稱之為Stand-up Comedy,黃子華將Stand-up Comedy以地道廣東話繙譯成棟篤笑,令不少人都大讚其用字精煉傳神至極,難怪他早就被封為棟篤笑教主。黃子華在03年舉行了《棟篤笑之冇炭用》之後,似乎沉寂下來,近年其風頭亦被詹瑞文及林海峰等蓋過。但近日無綫在深夜重播黃子華舊作《棟篤神探》,下月他更在伊館舉行棟篤笑騷,久未露面的他突然來勢洶洶,看來是要收復這塊棟篤笑失地!

其貌不揚的黃子華曾經在其「棟篤笑」中講過:「靚仔係唔係真係咁重要呀?有啲人話,男人唔使靚仔嘅,有才華咪得囉。係,你有冇試過帶你嘅才華落Disco識女仔呀?人哋啲靚仔一行入去,唔使20分鐘,就已經同啲女仔互相發問問題:『你度定我度?』我帶住我嘅才華入到去,幾難先搵到個女仔肯畀個機會我。唔係畀機會我交換問題,而係畀機會我天才表演,唱歌跳舞做話劇講大話功夫表演,成套《歡樂今宵》一個人做一次……」

現實生活中的黃子華向來擺明是以才華作為賣點,深得一群棟篤笑fans愛戴,16年來他已經先後舉行過八次不同主題的棟篤笑表演,至今依然不乏捧場客,觀眾不但沒有嫌棄他長相不夠靚仔,更期待他再次一個人做晒成套《歡樂今宵》。所以話男人的確真的不需要靚仔,賣才華其實一樣得。

24es12p1

一向以才華作為賣點的黃子華,下月再擺下棟篤笑擂台,誓要觀眾笑破肚皮。

港乏成人騷

黃子華下月在伊館舉行八場《黃子華棟篤笑之兒童不宜》,自言為今次棟篤笑籌備了三年的他,指香港一直缺乏成人騷,所以決定以兒童不宜作為主題,他說:「其實係想講成人嘅心態,唔係限制年齡入場,因為我發覺依家嘅細路已經好早熟,有一日喺街度聽到兩個中一、二嘅女學生傾偈話:『信男人,死啦!』其實佢哋都已經講緊錢、講男人、講女人,內容已經係成年人講嘅語言。

「不過當我阿媽知我用兒童不宜做主題之後,竟然非常關心咁日日打嚟問我到底係講乜,又驚我太粗俗,又問我會唔會講粗口,喺佢心目中認為我係大師級,所以成日話我唔需要咁呀!我細佬係做I.T研究嘅,就算佢講,阿媽都唔明佢做乜啦,我做嘅棟篤笑,阿媽次次都會睇,所以佢會畀好多意見。」

年輕時在加拿大修讀哲學的黃子華,一早已對話劇表演充滿興趣,求學時期更曾參與當地的電視劇演出,他說:「嗰陣試吓去試鏡,結果成功被取錄,個劇類似港台嗰啲一集過嘅單元劇,我喺劇入面飾演越南人,係男主角嚟㗎。」

24es12p3

外表看來冷傲的黃子華,其實表情多多,滿腦子充滿戲劇細胞。

24es12p8 24es12p11 24es12p10

外表看來冷傲的黃子華,其實表情多多,滿腦子充滿戲劇細胞。

事業起伏大

曾當過教師及資料搜集、電視台助導、話劇團演員、編劇等的黃子華,認為表演棟篤笑最令他有滿足感,他說:「好多嘢都可以喺自己控制之內,雖然要花好多時間,有時我可能會用十日嚟諗一句說話,起碼要過到自己嗰關,不過人總係永遠都覺得未夠最好嘅!」

黃子華在事業上的起伏可算非常大,其主演的《男親女愛》及《棟篤神探》都曾帶領他走向事業高峯,不過每次高峯過後,都總是突然銷聲匿迹,他說:「應該係咁㗎,冇嘢做,見乜嘢報啫,唔需要係唔係都出嚟乞人憎,適當地曝光就夠啦!拍完《棟篤神探》之後,我喺大陸拍咗三個劇,多咗時間休息,同籌備呢個棟篤笑囉!」

黃子華表示經常會欣賞世界各地的棟篤笑表演,他說:「喺外國多好多呢類表演,某啲小型嘅酒吧都會有個黑人做騷,佢哋講嘅通常都離不開性同種族歧視,最緊要係表演嘅人用乜嘢風格角度演繹出嚟。香港嘅我特別欣賞『進念二十面體』,覺得佢哋有齊娛樂性同啓發性,有好多成員仲係公餘時間去做,真係好有心。」

24es12p4

無綫近日深夜重播黃子華及蔡少芬的舊作《棟篤神探》,兩人更憑該劇勇奪無台慶「我最喜愛的拍檔」(戲劇組)獎項。

獲黃霑教路

黃子華剛出道時曾獲前輩黃霑提點,他視對方為最敬重的長輩,他說:「我第一次搞棟篤笑時,係冇人識㗎,霑叔約我出飲茶,畀咗好多意見我,仲借咗幾本書畀我參考,一個咁嘅前輩真係好難得。我心目中好難有人講鹹濕笑話可以超越佢,呢類笑話要處理得好好,先可以樂而不淫,否則會俾人覺得係下流。」

呵護女友 互留空間

黃子華入行後被公開的情史不多,舊愛潘芳芳及劉婉君已先後嫁人,幾年前他被本報拍下與年輕女友同遊蘭桂坊,當時女友顯得非常害羞,猶如樹熊般全程躲在他身後,黃子華直認二人拍拖至今,不過他顯然不願多談感情事,問他是否刻意保護戀情?他說:「最好係咁啦,唔好見報,我不嬲都唔會限制對方做乜,又唔會干涉對方,我覺得兩個人相處知道對方愈少愈好。

「I Love DoDo」

提起數年前與鄭裕玲合作《男親女愛》時傳出緋聞,他表示當時初次感受到緋聞的威力,他說:「我記得拍《男親女愛》時有記者探班,我淨係講左句『Oh!I Love DoDo』,就係咁就傳得咁厲害,嗰句『I Love DoDo』就等如我依家講I Love我隔籬助手阿May一樣,真係冇諗過大家反應咁大。」

24es12p6

電視劇《男親女愛》不但為黃子華奠定收視保證地位,他更因和鄭裕玲在該劇中擦出「愛火」,令他感受到緋聞的威力。

冷面笑匠 一炮而紅

現年46歲的黃子華,87年參加全能司儀選拔大賽入行,90年首創香港史無前例的「棟篤笑」一炮而紅,00年主演處境喜劇《男親女愛》大受歡迎,之後再憑劇集《棟篤神探》,奠定他冷面笑匠的地位。

電影失利

子華在無線甚吃得開,其間他曾轉戰電影,卻慘遭滑鐵盧,無論是自導自演的《一蚊雞保鑣》,還是與已故影后梅艷芳合演的《男歌女唱》,票房成績均未如理想。子華入行後曾與潘芳芳及空姐劉婉君拍拖,又曾與鄭裕玲、郭羨妮及蔡少芬等傳過緋聞,而他現時的女友正是02年與他同遊蘭桂坊的害羞女子。

24es12p7