若要人不知 唔好咁低B

2004年8月10日 | 快週刊 | #312

無線電視劇《棟篤神探》收視高達三十一點,成為近來之冠,其激受歡迎的主因是棟篤始祖黃子華鎮場。由他率領的電視劇,必是收視的保證,前有《狀王宋世傑Ⅱ》的賴三、繼有《男親女愛》的余樂天,到現在《棟篤神探》的莫探員,便是鐵證!而在劇中莫探員常說的:「若要人不知,唔好咁低B!」更是新興口頭禪,可見其影響力之大。

然而這種影響力,很多人認為是騎呢低俗。更說他是靠急才。縱觀子華擔當過的角色,大多都是學識低的市井之徒不懂英文,真正的他,其實曾在名校聖若瑟中學就讀,又到過加拿大「浸鹹水」,是位主修哲學,副修社會學英文流利的留學生。對於演譯市井角色,他回應:「我並唔介意做呢啲草根角色,反而樂意,因為市場架構嘅中產角色並不多,大部份都以草根角色為主,而每個角色,我都會花好長時間去度,迎合觀眾口味!」能夠看通觀眾口味的人確實不多,可見黃子華其實絕對不是騎呢低俗,大眾誤解他,以為他確是低B一族,只因為他「低B」得太精彩了!

interview_20040810_001

記者向來最怕遇到思考轉數比自己快的受訪者,因為這些人只會帶你遊花園,你問「東」,他永遠答「西」,這些人好像一早看穿你下一條會問的問題。而要訪問口才、急才出名勁揪的黃子華,記者一早就帶了旅行證件,準備隨時陪他環遊世界。殊不知,與他做訪問,他卻是十分被動,記者問一句,他就答一句,而且有求必應。記者懷疑,眼前的是黃大仙還是黃子華

「其實眾人認識嘅我,只係我其中一個角色,係做戲需要先做出嚟,唔係我真人。我真人好被動,唔係太多嘢講,不過我呢類搞笑角色好深入民心,搞笑草根形象令人認識我,好可能係『棟篤笑』令無綫搵我拍搞笑角色,一拍就停唔到!好多人認為我個腦轉數快,其實我絕對唔快,而且好慢,曾志偉、谷德昭就叫快啦,我重爭好遠!」子華解釋道。

One Man Band 度棟篤笑

「表面上做得『棟篤笑』嘅騷,好似個腦轉得好快,因為每分鐘出現嘅結果,大家都估唔到。」子華續道,「例如如果我講嘅笑話,觀眾覺得唔好笑會點應付?分分鐘都會變㗎!我唔否認我係有啲嘢(有啲料),不過我背後做咗好多準備功夫,先唔好講『棟篤笑』係點預備,平日嘅我每日都要睇報紙睇書,要完全令自己緊貼社會,呢樣係最基本嘅!而每個棟篤笑,內容好似輕描淡寫,其實我早一年就開始預備,先係,諗有乜題目會令觀眾產生興趣;之後會去不同地方做 Research,例如茶餐廳咁,到而家,我重有搭巴士、地鐵,小心留意每個乘客及聽佢哋講乜!跟住就會困喺間房裏面度稿,一直改到出 Show。唔好以為出 Show 後啲稿就唔使改,我會睇當時觀眾(第一場)反應,再喺每一場後再改良!(記者插問︰有好多人話你有一班智囊團,幫你度橋,係咪呢?)我都聽過唔少呢啲講法,不過我冇,我係一手一腳 One Man Band!」子華輕鬆地作了個簡而有力的澄清。

interview_20040810_002

其實眾人認識嘅我,只係我其中一個角色,係做戲需要先做出嚟,唔係我真人。

靠棟篤笑搏一舖

娛樂圈很特別,只要你紅,電影公司、電視台、唱片公司會陸續有人找你,黃子華不論電影、電視、唱歌都嘗試過,但半紅不黑的時候又如何呢?出道足足二十年的黃子華,不是一出道就有今天的成就。當中亦有吃過不少苦頭的他,幾經波折才找到這條特有的出路 ——「棟篤角色」。

「我喺加拿大讀緊書嘅時候,已經對演戲好有興趣,所以有 Part-time 做都會揀幫獨立製作公司做演員,而返到香港做咗好多行,八四年至入行港台做教育電視PA,又有做臨時演員。做臨記成日俾人炳,我都俾唔少場場務、導演用粗口侮辱過,都當係家常便飯啦!不過好多時人哋連鬧你都費時!叫你走就算!」子華娓娓敍述崎嶇星路。

interview_20040810_003

雖然子華堅拒承認口才了得,但八七年參加司儀大賽,若不是口才了得,又怎會自薦參加?

與張達明不和

直至九五年,失意的黃子華,孤注一擲搞《棟篤笑》作為轉行前的告別作:「我當時用咗《娛樂圈血淚史》作為我嘅題目,其實都係自己入咗呢個圈嘅一啲感受,希望同大家分享,搞《棟篤笑》主因唔係要發明星夢,我係要證明我黃子華係有實力,就算冇人睇都算還咗心願!」結果竟是欲罷不能,他分別在九二、九三、九四及九五繼續搞多四次《棟篤笑》,在觀眾心目中,黃子華已是一個執生王,而第五次更找了當時藉藉無名的張達明合作。

沒想到張達明也能一炮而紅,繼後在電視劇《狀王宋世傑Ⅱ》中,子華一手提攜的達明竟然成為主角,而子華只是飾演一個被對方戲弄的配角,這可以說是一個大諷刺,難怪外間有傳子華與達明不和。

問及他與達明之關係,子華回應:「我搵佢合作係因為我當時喺港台工作,見到呢個衰仔有急才,OK,所以咪一齊合作,亦可以話係我一手帶佢出嚟!」子華始終沒提到二人目前的關係,恐怕讀者要從言談間去了解發掘了。

interview_20040810_005

一手由子華提拔的張達明,成就比子華要好,相信連子華也估不到。

多謝鄭裕玲教導

千禧年是黃子華收穫豐富之年,他憑着電視劇《男親女愛》演出余樂天一角而令更多人認識。當中包括大陸電視台亦找他拍劇:「我好開心可以拍到《男親女愛》,同時好多謝 Do Do(鄭裕玲)揀我同我合作,又教識我好多嘢,例如教我在近鏡頭時唔可以郁得太誇張咁。」

成功非僥倖,單就余樂天一角,子華就是參考了身邊一位老死的性格,再花了不少心思改良演譯,而不是單靠劇本或導演意見去演。

「好似眼神、笑位及動作,我都加了自己的演譯方法,看起來會比較流暢!」結果收視破紀錄高達四十二點!

到零一年連內地電視台導演亦因為看了他這套電視劇,覺得他的演繹方法別樹一格,而找黃子華拍《溥儀》:「這位導演完全唔識我,只係見過我做《棟篤笑》,知道我可以一人有唔同演譯的方法,而搵我拍非常嚴肅嘅劇集《非常公民》演溥儀一角,我當然好開心,就算我將來冇戲拍都唔會介意,因為最大挑戰性嘅溥儀我都演過,重有乜遺憾?」

interview_20040810_004

鄭裕玲對黃子華的演藝事業幫助很大。《男親女愛》令他的人氣急升。

揀蔡少芬做「棟篤」

零二年黃子華被無綫急召救亡,希望以他的口才及擅長的 One Man Band 拾回收視率。擔任遊戲節目《一觸即發》主持,到現在《棟篤神探》一劇,無論對白及選角都是他的主意︰「我一定要喺拍攝前早幾日收到對白,因為我會以我自己獨有方法再演譯(唔會只背稿),始終導演唔會太了解演員如何詮釋。而李慧慧一角,都係我向監製提出搵蔡少芬,我覺得由佢演譯會好好笑囉!」子華兩眼發光,手舞足蹈地說,完全充滿自信。

雖然黃子華有問必答,但他也有致命死穴,當問到他的「感情世界」—— 前女友劉婉君、緋聞中的郭羡妮及現任女友「翻版關詠荷」,他立即變得很嚴肅說:「聽住喇,我同每間傳媒都係咁答,係十六字真言,『感情很好,有目共睹,多謝關心,結婚尚早。』」莫非有求必應都只是角色的一種演譯呢?

interview_20040810_006

我係要證明我黃子華係有實力,就算冇人睇都算還咗心願!

後記:最佳男主角

老實說,記者亦是黃子華《棟篤笑》的忠實 Fans,能與他見面,當然希望能看到他搞笑的一面,但很失望搞笑完全欠奉,只是看到他嚴肅又謹慎的回答問題,失望之餘亦深深明白到他所說「搞笑只是他演譯角色的其中一種,真人不是這樣」的真正意思。

再翻看資料,才發現子華的出生年份是一九六零年,比劉德華還要年長一歲,雖然後者獎項「成籮」,又是應屆影帝,演技毋容置疑,與黃子華在熒光幕上及與記者接觸的表現更是南轅北轍。但在記者心目中,未獲過什麼獎項、年齡看來三十多,實情四十多的子華擁有比劉華更堅的演技。有這樣好的演技,如果我是應屆金像獎評判,一定會頒「最佳男主角」給黃子華

interview_20040810_007