由掌聲雷動那一刻開始，黃子華所講的都是笑話，不當是真的。子華徒步穿越兩條街去到訪問地點，他說：「頭先喺街度行都冇人認得，幾舒服呀！」唔係啩？冇人認得？子華又說：「我喺內地拍劇，係做靚仔小生㗎！」無法確定他是在自嘲、講笑還是認真，總之他就是講得好笑。

同行笑爆嘴的詹瑞文也令子華拍案叫絕，「詹瑞文十年前就應該爆出嚟，今日先紅，遲咗喇！」應該是感同身受，這句話，倒說得有血有肉。

黃子華坦言香港內地大不同，香港觀眾渴望笑料，而在內地他則可以飾演「靚仔」。

棟篤騷停不了

記得子華在第二次棟篤笑騷上說，他的第一個棟篤笑，是為自己的娛樂事業畫上句號而開的，所以叫作《娛樂圈辛酸史》，浮浮沉沉鬱鬱不得志，人家離職寫辭職信，子華則選擇了開騷告別，意想不到的是處男作空前成功，打後棟篤笑一炮響過一炮，一開便是十多年，這許多年來，棟篤形象深入民心得深處未見深。

「香港同內地有好大分別，香港一定要求我交番棟篤笑嘅嘢，但係內地就唔同，佢哋當我係一個演員，原來自己都可以做靚仔小生。」

子華坦言貪娛樂圈時間彈性，不用每天返工。

踏紅館僅虛榮

由《男親女愛》開始，子華接下來的工作都是「個人花式表演」孭重飛，《棟篤神探》、《棟篤狀王》甚麼都是棟篤，靚不靚仔在乎觀點與角度，事實上，其小生地位在香港早已紮實穩固，但無論是甚麼角色，老細畀錢是要子華的棟篤笑。

「今年會再開棟篤笑，都係喺伊館，曾經有人提議我去藝術中心搞，但一旦背住『藝術』呢兩個字，會好痛苦，而紅館就更加唔會選擇，去紅館，虛榮而已，始終喺伊館做咗咁多年，覺得自己可以控制到個場，又得心應手。」

詹瑞文早該紅

棟篤笑似乎已變成了一個有力品牌，正如走入LV、Gucci、Joyce，已不用質疑設計款式料子這些那些。子華之後，大大小小堅堅流流身體力行傾家蕩產也要插支棟篤旗的，多如天上繁星，但真的有力後繼的，恐怕只有詹瑞文一個。

「我當然有睇過詹瑞文嘅騷，佢真係好叻，好老實講，以佢嘅才華，十年前就應該爆咗出嚟，今日先紅，真係遲咗。」

冇人識更自在

子華離港闖神州的日子，詹瑞文在香港幾近九星連珠般騷接騷爆完又爆，舞台棟篤笑由詹瑞文獨領風騷，子華對自己人氣下跌，總有些個人見解。

「我唔覺我去咗內地拍劇呢段時間，會令自己人氣下跌。事實上我不但唔鍾意人氣呢樣嘢，過往拍嘅劇都係紅戲唔紅人，最叫做人氣旺盛嗰段時間都係我拍《男親女愛》時講咗句『I Love Do Do』，但係呢句嘢我成日都講，講得最多係『I Love 青雲』（劉青雲），喺《棟篤神探》我亦講過『I Love 蔡少芬』。係喇！《棟篤神探》都係一套紅戲唔紅人嘅劇集，所以人氣呢樣嘢喺我身上一直起唔到作用，好似頭先我行嚟做訪問咁，喺條街都冇人認得我，我反而樂在其中！」

子華盛讚詹瑞文有才華，更說他應該早在十年前已走紅。

拍劇違背原意

子華電視劇的產量不算多，但每套均成為一時熱話，自說自話紅劇不紅人，謙虛而已，死唔信隨便找個小生演《男親女愛》、《棟篤狀王》都可令觀眾笑得人仰馬翻。

「做電視主角壓力好大，要由頭擔到尾，即係話由第一場到最後一場，都要保持一定嘅水準，太持久嘅集中力會令人好攰。最辛苦嘅係仲要日日朝九晚五開工，今日做完聽日又要返廠由頭嚟過，拍《男親女愛》拍到五十幾集我已經好攰。日日如是嘅工作程序，簡直違背咗我做呢行嘅目的，我入娛樂圈就係為咗唔需要日日返工，所以有人叫我客串拍電影，錢收少少都冇所謂，但係拍電視就唔得，一定要收足，大佬，辛苦錢嚟㗎！」

棟篤笑、棟篤狀王、棟篤神探，黃子華似乎跟「棟篤」二字密不可分。