黃子華昨日應邀擔任清談節目嘉賓，問到曾承認留案底一事，他和盤托出，當年更為此守行為，但不知有否留案底，只知不能投考警察。

昨日黃子華擔任《志雲飯局》的嘉賓，獲主持陳志雲送上一隻金鑊及鑲滿假水晶的舊式咪高峰。事前子華笑言當得知獲邀出席節目後，一直感到很大壓力，前晚更睡不着。提及苗僑偉日前於錄影該節目時兩度落淚，子華表示比較理性，最多只會拍枱、拍櫈及拍牆，只要不牽涉他以外的事情，便事無不可對人言。談到95年曾透露有案底一事，子華抵死說：「睇唔出哩！中三嗰年同四個同學去相思灣玩，見到有隻舢舨咪推出去玩，點知船主個外籍太太報警，警方就派咗水警嚟，最後咪連人帶船返警局。船主都知我哋貪玩，但警方唔畀銷案，仲搞到要守兩年行為添！講真我都唔知有冇留案底，淨係知後來考警察考唔到！」

鍾情忘年戀賴市場壓力
對於陳志雲事先張揚追問其感情事，子華說：「盡量啦！費事浪費人時間啦！（如果係真都會講？）只要唔傷害到人冇乜問題，有啲嘢傷害到人就最好唔好啦！（話你鍾意親女仔都細你好多喎！）唔……一陣答！要諗諗點答先。其實都唔係嘅，成熟嘅女仔慢慢都嫁晒，我又冇娶老婆，市場上咪淨係得番細嗰啲嘛！」

黃子華（右）獲陳志雲送贈金鑊與咪高峰，難道暗指他要「補鑊」？