今日係黃子華58歲生日，子華神在Facebook貼非洲小朋友嘅祝賀短片，一班小朋友用普通話講：「子華神，生日快樂！搵食啫，犯法咩！金小姐阿蘇祝賀！」跟住又唱又跳Happy Birthday，十分好笑。

子華神寫道：「原本生日匿埋，點知蘇施黃送份咁嘅禮物俾我，笑到我瞓喺度，希望佢唔好剝削呢班小朋友嘅薪酬啦！鋪上嚟，等大家都笑下！」網民留言：「阿蘇係癲啲，但好有心思同笑鬼死！生日快樂！」、「子華，生日快樂，人生有個真正朋友的確好極！」

阿蘇接受《蘋果》電話訪問表示：「淘寶淘返嚟㗎，因為佢（黃子華）最近話想幫非洲小朋友，咁我睇到啲小朋友幾得意，其實淘寶都好平，只係22、23蚊美金，可能細路得好少錢，但對佢哋都好有幫助，又做得幾開心，成件事幾好，又可以幫吓小朋友。」

阿蘇話，淘寶有幾個版本選擇：「一個係閱兵，但生日『打槍』唔係幾好；另一個係蘇聯美女講廣東話，但冇表情，最熱烈係小朋友版本，我想幫小朋友多啲，覺得幾得意幾新穎，心意上又幾好笑，自己收到片都好開心。」

呢條片人仔收費148元，但阿蘇選擇畀美金$22.46：「佢仲要好犀利，我下午3點去淘，問幾點會有？回覆話傍晚5點幾，仲問我想黑板寫乜嘢字？想細路講乜嘢？因為細路講普通話，咁大鑊，因為死人黃子華啲金句係廣東話，咁點呢？結果我喺度諗，『搵食啫』，飛吻嘅吻咪『搵』，『食』就sick，『啫』就『摺』，我就『搵食啫』變『吻sick摺』，自己收片睇完又睇，笑完又笑。」

其實這類「非洲小朋友同你講生日快樂」非新鮮事，去年已引起傳媒關注。《北京青年報》報道稱，一條類似片段，出鏡嘅小朋友會得到零食或幾蚊作為報酬，負責拍片嘅非華人約獲幾十蚊，但淘寶商家就以兩倍及至更高價錢出售。有代理商承認：「做一條視頻，花在孩子身上的錢是很少的，大部分錢還是被拍攝者和商家拿走了。」

因為極具爭議，「非洲小朋友舉牌」去年在淘寶悄然下架，阿里巴巴回應BBC中文網稱：「我們意識到第三方賣家在淘寶上掛出的此類服務。我們已經採取行動移除了這些產品未來將繼續這樣做。」不過，很明顯這種「商品」已再度上架。

對於子華話希望呢班小朋友嘅薪酬唔好被剝削，阿蘇嘆謂：「點會唔剝削呀，但可能10蚊8蚊喺佢國家都有啲用！條片真係喺非洲做噃，真係非洲小朋友。初時都擔心會唔會搵笨呢。我早咗一星期做，點鬼估到即日收到，最慘呢個禮拜要守秘密，又唔講得畀任何人聽，當然我有畀金小姐（金燕玲）睇，我哋笑得好開心，覺得係一個幾好嘅禮物。」

阿蘇淘寶非洲小朋友講金句賀子華神牛一