「男神」黃子華舞台劇噚晚演出時，下半場約10點半時，突然有一名年約20多歲男觀眾企身大嗌：「特種兵有冇嚟？」全場嚇到靜晒，跟住該男子坐低摷背囊，然後衝出門外離開現場，台上嘅子華同法拉都呆咗。

捧場有Chilam夫婦、「長腳蟹」呂慧儀等，由於男觀眾坐近張智霖同袁詠儀附近，大家都驚，工作人員即睇吓男觀眾嘅座位有冇留低可疑物品，擔心威脅大家生命安全，好在冇任何發現。

完場時子華發揮棟篤笑精神，喺台上話：「頭先自己以為有生命危險，嗰位觀眾問有冇特種兵喺度，唔通有領導嚟咗？自己都嚇一嚇，一度想叫停演出，多謝法拉咁淡定，順利完成演出。」

事後法拉接受訪問表示：「自己都有啲驚，唔知有乜事發生，好在冇事，當時自己演出深情一幕預備喊，子華唔叫停唔敢停，the show must go on。」法拉剛才喺微博留言：「電話鈴聲就晚晚有，昨晚卻是第一次遇到有觀眾站起來叫停，長知識了！哈哈。多謝觀眾一起那麼鎮定和入戲。」

此外，有份睇舞台劇嘅長腳蟹於微博寫道：「前度真係好好睇！雖然我都係第一次睇舞台劇中途會有一個人在觀眾席大叫「等等！特種兵係咪黎咗」，全場觀眾都呆咗，但法拉大師姐都可以處變不驚，繼續她的感情戲，還要喊！將觀眾的注意力又帶回台上，太利害了！因為這個奇遇在謝幕的時候還有子華哥的笑話，bonus！」

「長腳蟹」呂慧儀微博截圖

袁詠儀facebook截圖

噚晚群星捧場

陳法拉微博截圖