世杯結束「一觸即發」收視回升

2002年7月4日 | 東方日報

黃子華主持的無綫遊戲節目「一觸即發」隨住世界杯的結束,上周收視開始再度回升,他昨日獲悉好消息後都立即笑笑口:「好過冇,其實收視就等於投資一樣,可升可跌,好彩我終於都贏咗朗拿度,冇得再睇佢吖嘛!」

有指他似乎連自己主持的節目好無信心,連鄭裕玲都婉拒做嘉賓的邀請覺得冇得幫,子華就解釋:「唔係冇信心,我素來都係客觀,知道唔係一個人惡晒,何況當自己都走去睇世界杯嘅時候,就知道係冇得傾冇人幫到。總之盡力啦,我一向接節目做都係諗住唔好衰過以前嘅啫。」

獎金多冇錢出糧
對於有批評每集送出的獎金太少,他一樣另有見解:「我都希望愈多愈好,不過俾得多就冇錢俾我(出糧),話晒我都要面對世界杯,可能都係咁樣好啲。」

此外,亞視於本月中再度推出「百萬富翁」,子華雖然不知道時間上會否對撼,但就未有懼色:「我有信心自己做得好,陳啟泰都係做得好,就算大家交換嚟做一樣都好。」