黃子華喺7月底，完成咗佢棟篤笑收咪作《金盆浪口》26場騷後，子華都未有公開露面。神隱差唔多兩個月嘅子華，即使遠至加拿大，佢都被《蘋果》讀者野生捕獲，當時子華身處加拿大卡爾加里機場，而最大亮點係，子華嘅一頭金髮。

頭髮要染黑、染白定染金，想點染立刻就可以變色，而黃子華多年嚟都試過染髮。好似讀者Johnson透過「爆相爆片」影到子華嘅新相，當日喺本月17日，Johnson表示：「子華當時坐喺加拿大卡爾加里機場內，佢係搭內陸機去溫哥華。」相中嘅子華，着住件黑色羽絨坐响候機室，而佢一頭漂咗嘅金頭髮較為突出，但佢個樣仲有點疲倦，木無表情。本報曾致電其經理人May查詢，May表示：「子華係放緊假。」至於子華去加拿大做乜，或點解會漂咗頭髮，May表示唔清楚。

自從黃子華做完棟篤笑之後，就冇再公開露面，而今個月5號係佢58歲生日。當日子華喺佢嘅Facebook度貼咗張相，相中嘅子華頭戴黑色帽，手執一個壽包，精神唔錯仲微微笑，隱約見到佢耳邊嘅「的水」有啲白髮，但睇落當時未有漂頭髮。

而同一日子華再分享多一段片，片中有一班黑人小朋友，跟住一把男聲，讀出黑板上嘅字，先用國語讀：「子華神，生日快樂！」跟住轉channel用廣東話讀：「搵食啫，犯法咩！」之後再嚟國語讀：「生日快樂！唔呀！」然後唱英文嘅生日歌，子華留言寫住：「原本生日匿埋，點知蘇絲黃送份咁嘅禮物比我，笑到我瞓喺度，希望佢唔好剝削呢班小朋友嘅薪酬啦！鋪上嚟，等大家都笑下！」原來係蘇絲黃同金燕玲送上嘅驚喜。

黃子華告別騷後，正放緊假。

黃子華漂咗金髮現身加拿大機場。