黃子華今日去中環出席活動時，談到劉德華於泰國墮馬受傷一事，子華原來不知此事，一臉愕然：「吓？幾時嘅事？希望佢冇事啦！佢冇事嘅，華哥俾我fit咁多，希望大家過一個平安嘅新年。」

問到子華有否試過受傷？他稱：「有次去玩，試過騎馬，騎咗上去，隻馬拋番我落嚟；之後我再騎上去，隻馬向住堆樹衝埋去，堆樹係隻馬過到，但我過唔到囉，一分鐘拋兩次落嚟。我都冇事囉，華哥咁fit，一定冇事嘅。」講到墮馬經歷，佢就話當時並唔係拍戲，只係去玩，可能隻馬知我唔係搵食，總之就希望華哥能夠吉人天相。

同場嘅古天樂得知華仔墮馬，古仔就話騎馬真係好難控制，因為騎馬都要夾人嘅，事前一定要學騎馬。古仔都講到自己兒時都有陰影，當時爸爸抱住佢去騎馬影相，點知隻馬撞中咗佢個頭一吓，當時只有兩、三歲，大咗阿爸講番俾佢聽，當時用菲林機影相，用咗閃光燈，所以隻馬郁咗一郁囉！所以古仔依家拍有馬嘅戲都係拉住隻馬多，講到佢拍《尋秦記》都有騎馬，佢就話當時隻馬好溫馴，同佢講嘢都會點頭。

子華同古仔今日一齊出席活動，被問華仔泰國墮馬受傷一事。