子華法拉《前度》勁吸明星撐場吳君如睇到眼濕濕

2016年7月25日 | 蘋果日報

黃子華同陳法拉主演嘅35場舞台劇《前度》，截至噚晚（24日）已演咗21場，場場爆滿之餘，亦吸引唔少明星捧場，繼劉德華、張智霖、袁詠儀、容祖兒等人後，噚晚輪到吳君如、陳可辛、邱禮濤、何超蓮、何超雲、劉家豪、梅小青、陳彥行、梁思浩等都有嚟捧場，可以話係最多圈中人嚟嘅一晚。

吳君如睇完之後，到底覺得好唔好睇呢？佢話：「今晚第一次睇，兩位主角將原著角色嘅感情演繹得淋漓盡致，又非常合拍，好好睇！」佢又自爆睇舞台劇期間，仲感動到眼濕濕。其實上年佢同黃秋生演舞台劇《狂揪夫妻》時，法拉都想去睇，但因佢喺美國讀緊書，始終無緣欣賞。