黃子華最後一次開棟篤笑騷，26場全部爆滿，諗番90年代第一次開騷，真係有好多回憶。前晚好兄弟林祖輝捧場，一到後台探班，子華即刻哭成淚人，嚇到在場人士一時間都唔識畀反應。

林祖輝今日接受《蘋果》訪問時話：「我都未見過佢喊！未講嘢都震晒，完咗諗住打個招呼，佢唔知我喺度。」祖輝話同子華喺商台同亞視都一齊共事過，所以變成好朋友，當年子華話想搞棟篤笑，祖輝二話不說就幫手，佢話：「對我嚟講唔係咩事，我就唔覺辛苦。佢話想搞，我咪幫佢去攞表Book場囉，大家都驚冇人買㗎，當年係文化中心搞，得三百幾個位，仲要開兩場。」

兩兄弟一齊去油麻地貼街招，又去尖沙嘴太空館門外拉Banner，祖輝諗番都笑笑口話：「都唔知點解揀油麻地，應該去啲高級啲地方嘛，貼完都唔知有冇效，好彩又爆喎。之後就由文化中心搬去伊館，再由伊館搬去紅館，我諗子華都係有太多回憶，話晒係最後一次搞啦，睇番佢開騷前嘅video，一張大櫈、鞋、床等道具，好似話你知所有嘢告一段落咁，我睇到都有感覺。」祖輝直認現在與子華少咗聯絡，因為各有各忙，佢話：「大家係少咗聯絡，但朋友就係咁，有事就一定幫手。好似我幾年前開童裝鋪，佢都二話不說嚟撐場。」

祖輝與子華喺相識逾30年嘅好兄弟，見面即抱頭痛哭。

林祖輝同鄭啟泰一齊去捧子華嘅棟篤笑。