黃子華《金盆浪口》棟篤笑頭場，講陳冠希。

「首先，利申，各位，我都好相信，今晚我都冇乜女fans剩，我識陳冠希，我相信陳冠希都唔係好想我講佢，唔需要為佢平反，即係同陳冠希講，『This is not about you！This is about us！』係有關我哋香港我先會講嘅啫。」

「陳冠希因為花弗，被封殺。題外話，『花弗』呢個term呢，你一個人要花，首先係要弗。陳冠希當年好弗，所以好花，ok？然後全城封殺，從此絕跡香港娛樂圈。」

「各位搞清楚，我唔係推銷花弗。依家啲人有一個用語嚟形容啲人好花弗，係好直接嘅，叫做『呃蝦條』。有人唔識嘅話呢，叫你隔籬嗰個解釋俾你聽。就係太粗俗喇，我係唔可以講嘅，不如搵個勇士出嚟同大家講一次。」全場騷動。子華就笑：「咁咪好，大家『面斥有雅』。」

「我認為用『呃蝦條』去形容花弗，佢嘅好處就係，蝦條係咩呢？佢係一樣零食。如果一個人，成世都係食零食，佢冇食過正餐呢，佢肯定係有好多後遺症，肯定會營養不良。所以我唔係推崇花弗，我只係想問，一個花弗嘅明星，或者演員，係咪從此就冇資格做戲呢？一個花弗嘅冷氣佬，係咪從此唔應該俾佢整冷氣呢？『梗係啦佢咁花弗，會漏雪種㗎嘛！』」

「依家，喺美國，有一條友，係非常之咁花弗嘅，係做緊總統。咁搵乜嘢人演佢呢？最好搵一個花弗嘅演員囉。但係唔得，我哋香港唔容許花弗嘅演員。我哋香港係嚴謹到，總之你有婚前性行為，你就唔可以做演員，唔可以做娛樂圈。」

「拿，咁公平啲，不如你取消娛樂圈！成個娛樂圈，我諗係淨番蔣志光一個！」觀眾拍案叫絕發出會心狂笑。

「我唔係話蔣志光係，我只係話，如果蔣志光同我講佢係，我信！如果其他人講，我唔信！我唔理，胡楓講我都唔信，但我唔信唔代表佢唔係，要搞清楚。」

「我哋係嚴謹到，某啲交歡嘅動作，係應該違法嘅屬於，我哋睇咗人哋咁多嘢…呢點我承認，我頭先都講咗，動物測試，應該係違法嘅。但你唔牽涉金錢交易，你情我願嘅，我只會勸你，得閒去驗下眼。事實上，我係有個朋友，佢係做武指嘅，好好功夫嗰啲，佢有一日同我講，『你知唔知我女朋友做咩？跳芭蕾舞，企喺度，一字馬，仲可以轉圈。你諗下，我哋係咪好睇過睇戲？』」

「我好鄙視佢，我問佢，『你呢套乜嘢戲？破壞世界文化遺產！你依家即係咩呀？精武門橫掃天鵝湖呀？定係胡桃夾子夾破狼呀？』鄙視！『但係，你套戲又唔係公開上映，我奈你唔何吖！如果你係公開賣飛，你預我兩張吖！我自己唔睇呢啲嘢㗎，我要嚟炒！』」