【擺脫票房毒藥之名】搵10倍巨星助陣 黃子華:有人連利是都唔收

2017年4月30日 | 蘋果日報

黃子華同佘詩曼今晚喺中環一間酒吧出席主演電影《棟篤特工》嘅煞科宴,子華話呢套戲已經拍咗兩個月,仲好感動好多朋友嚟幫手:「原本只係需要兩個巨星,但拍拍吓嚟多咗10倍,所以好感謝、好感謝呢啲朋友,佢哋嚟拯救我唔使再做票房毒藥。」多咗咁多人咪超支?子華話:「好多謝有啲人連利是都唔收,仲要請埋嘢食先至走,所以我今次真係有言感激。」

問到子華係咪好介意做票房毒藥?佢話:「我唔介意,我係現實嘅人,反而對我嚟講係舒服,不過嚟緊當然唔好啦,因為大家都落咗好多苦功,老闆都好大膽,今次阿佘亦都有破格嘅演出。(點破格先?)阿佘會被醜化,有好多個造型。」

阿佘即補充話:「喺臨近尾聲嗰個造型,連子華都覺得好正。」子華隨即讚佢:「你唔係醜吖,只係大家未見過呢個佘詩曼啫!」問到阿佘係咪為咗幫子華,只此一次扮醜?阿佘話:「唔係吖,其實都幾可愛。」子華話:「其實係我幫佢搣甩原本嘅佘詩曼囉,佢已經去到彼岸喇!」子華仲大讚阿佘可塑性好高。

提到「巨胸翠如」鄧月萍幫子華解皮帶嗰場戲,子華讚對方落力,仲話自己特登搵一條好難除嘅皮帶,問到有冇被掂到敏感部位?子華話:「哎,我已經過咗呢個階段,已經到咗岸中。」阿佘即搭嘴:「佢嗰度都我用斗零踭狂踩。」子華再話:「已經做足安全措施,冇計啦,做007都係被人虐待。」

1493554930_f1bc

1493556336_4cde

子華話呢套戲已經拍咗兩個月

1493556340_686a

子華坦言唔介意被稱「票房毒藥」

1493556343_f859

子華又讚阿佘喺片中尾段嘅造型好正