喺男神黃子華身上，你會發現一個奇怪嘅現象，就係子華神嘅棟篤笑，所向披靡，每次開騷，喺零宣傳下，門票通通被秒殺。

至於子華神有份做嘅劇集，收視例牌高企，就算自認唔睇膠劇嘅網民，都會乖乖坐低捧偶像場。可惜諷刺嘅係，喺演藝圈另一個領域──電影，黃子華至今未試過打破宿命，由最初青澀嘅《神算》、到浮誇嘅《男歌女唱》、再到自導自演嘅《一蚊雞保鑣》，票房口碑通通皆仆，連黃子華都喺棟篤笑嘅騷不停自嘲自己係「票房毒藥」

之但係，喺邊度跌低，就要喺邊度爬起身，曾經立志要做一個出色演員嘅子華，最近就自編自演新戲《棟篤特工》。老實講，個戲名着實有啲old school，不過為求一雪前恥，明明一年前開拍，但子華就足足花咗一年時間不停改劇本，改到第10稿先開鏡，女主角搵咗7年冇合作嘅佘詩曼，子華更碌盡人情卡，搵咗Sammi、君如等大星客串。為咗保密劇情同造型，除咗3月初開鏡外，一律嚴禁探班拍照。

而日前，《蘋果》發現子華喺大埔林村一間士多拍攝一場打麻雀嘅戲，搵咗君如、麥玲玲同欣宜等人客串做麻雀腳。由於要保密，士多門外早已佈滿「18銅人」同一列車陣，每有途人經過，都會被劇組人員邀請離開。

現場所見，戴住黑超嘅子華，不停手舞足蹈教、動作誇張教其餘雀腳洗牌，搞到坐喺隔籬嘅麥玲玲同欣宜都忍唔住狂笑。至於君如就笠住假髮扮大肚，造型頗娘吓！雖然君如只係客串，不過見佢空檔嗰陣，好認真同子華傾劇本對白，簡單一場打麻雀戲，都足足拍咗個幾鐘。

雖然對新戲加求盡善盡美，不過子華對《棟篤》嘅票房都未敢寄予厚望，開鏡嗰陣佢就自嘲話：「我慣咗冇票房，你話我有冇壓力吖，我一啲壓力都冇。」

玲玲姐啊，佢係唔係做一個算命特工