「依家好多年輕人，好懷緬香港黃金年代，即係香港70年到90年代咁樣樣，各位，我嘅黃金年華，就踏正香港嘅黃金年代，咁即係話，你懷緬嘅，係我，唔好叫我黃子華，叫我黃金華。」全場大笑。

子華續道：「冇錯，係黃金華嘅年代，好鍾意講核心價值係咩嘢？就係法治精神，而咁多法律裡面，最重要係咩呢？咁多香港法律入面，最重要係你要知道自己住喺邊，因為任何時候都有人走嚟問你，『你邊度㗎？』你唔知個後果係好嚴重咩？下？」

「嗰陣時嘅法律係好嚴厲。今時今日，你揸車唔守規矩，超速係犯法，當日你望嘢，望得唔守規矩，眼超超，即係眼超速咗兩次，好嚴厲㗎個後果係！更加嚴厲你超佢，佢又超番你；你再超番佢，喺法律上呢個係『唔順超』！你係請律師都打唔甩。」

「即係喺黃子華嘅黃金年代，你最緊要係認識三個字，呢三個字你唔識，你係會死，行街有人叫你，你點應佢呀？叫你名，擰頭望？唔係，你繼續向前行，然後，直接講嗰三個字，『點錯相』，最好係跑添，『點錯相！』，『真係你係點錯相！』，喺嗰個年代，日日都有斬人，劈友，OK？喺嗰個年代，香港冇咩人戒煙，因為你被人劈死機會係大過心臟病發好多，直頭你一路跑，一路要食。『點錯相！（吸煙狀），有無火？真係點錯相。』」

「嗰陣時，我同阿強去餐廳食嘢，我哋食完係盡量唔埋單住，因為如果你好彩，就會有人入嚟劈友，咁你就會唔使埋單啦，『唔關事嘅踎底！』，『踎底啦衰仔，你係咪衰，叫咗你叫多個甜品啦！』」

「嗰個年代嘅黑社會係多到，多到我唔敢媾女，因為我驚唔覺意媾到啲大佬個女，喂，係真係好多大佬，大家都知道，一個企業，得一個CEO；但係一個幫會，每一個階層都叫做大佬。」