黃子華提到藝術導演與王晶的分別，他稱當年曾睇過該藝術導演的午夜場，他描述當時情況說：「每個人走出嚟時好似喺毒氣室走出嚟，雙眼發紅，充滿仇恨，點解呢？因為冇人睇得明。」並指該導演的片，用盡大卡士拍部戲，但演員行來行去似「自由行」，當年蝕大本但冇人憎佢，他說：「睇住幾個大明星自由行，咁佢哋又唔係好似好知自己行去邊咁，得閒咪講吓嘢囉，我都冇見過咁口黑面黑嘅女主角，忍咗個幾兩個鐘，終於部旅遊車到喇，部車要開喇！又要等個嚮導。咁邊個做嚮導呀？嚮導終於出現喇喎，原來係二郎神！因為佢之前套戲冇出現過，佢好似係《封神榜》走過嚟咁，二郎神出現做咩呢？一上車、梳頭！梳完頭，落車，成套戲，完！」

子華還嘲諷片中的不明之處，子華稱：「有齊大卡士大製作，出色嘅對白『冇雀嘅腳仔』，但係你就係唔知佢講乜鬼嘢，但拍咗成4,000萬，喺香港只係收得900萬，喺嗰個年代，我認識好多香港嘅電影人係好唔鍾意王家衛，因為佢蝕大本？唔係吖，小弟都拍咗套叫《一蚊雞保鑣》，好似收咗5位數字呀，蝕大本都冇人憎我喎。」子華再將王家衛與王晶比較，他說：「我識得有個朋友，叫做王晶，我諗佢唔係好鍾意王家衛，因為拍咗部戲，係搵我扮王家衛，我估係特登搵我嚟刺激佢！我喺王晶套戲裏面扮王家衛，我個名叫『王晶衛』，啲人就話咁即係王晶想笑王家衛，我相信晶哥係睇得好通！」

大卡士大製作唔代表一定收得。