一連11場《黃子華棟篤笑唔黐線唔正常》 前晚在紅館開鑼，一票難求，全場爆滿，子華幽默風趣諷刺時弊，追貼全城熱話，論盡現代人的各種生活態度，連韓劇都撈埋，早排勁Hit嘅都敏俊（金秀賢）當然走唔甩，全晚絕無冷場，繼昨天已劇透的精彩內容，今日《都市日報》再爆其餘爆笑位。

黃子華的棟篤笑一向深受歡迎，擺明以內容吸引觀眾，全晚只換了兩套服裝，子華以事時話題作開始，形容回歸後的香港跟中國，已由母子關係變成婆媳關係，他說：「依家香港嘅問題，係婆媳糾紛，所謂婆媳糾紛，係一種必然瀨嘢嘅關係，係咪？」獲得全場掌聲。

講都敏俊教授
由時事講到日常生活，子華提到人氣韓劇《來自星星的你》，「有咩人有資格同女士相處？咪就係都敏俊C！唔係維他命C！係來自個粒星星400歲嘅外星人，仲有400歲智慧！400歲嘅成熟同17歲嘅面孔，仲有嗰層咁靚嘅屋，供咗400年一定供完喇！」講到男女關係，子華笑指現時全球離婚率極高，他笑稱：「如果你今年要去4次飲，你有1次唔使去，因為一定離婚，中國仲恐怖，百幾萬人結婚，有二百幾萬人離婚，好似你入戲院睇戲，出嚟嘅人多過入去睇戲嘅人，仲唔係撞邪，話唔定第時結婚，當佢哋交換戒指時，你要打定堂齋。」子華更擺出耍桃木劍辟邪的姿勢，令全場捧腹大笑。

八哥升呢金毛
子華提到很多人愛狗多過愛人，行街時見過有位女士推住部嬰兒車，他笑謂：「咦！BB個樣醜到成隻八哥咁嘅，個女士話，佢真係八哥，仲話要同隻狗去撐腳，去狗餐廳飲狗紅酒。仲有啲狗殯儀，我真係唔明，隻八哥屋企人點叩頭同家屬謝禮呢？仲話可以超渡隻狗，人超渡就話希望佢來生過得好啲，咁狗呢？唔通幫佢『升呢』，由八哥升到金毛，再升貴婦咩 ？」

表演期間，子華多次清唱，最搞笑其中一次清唱完後，他笑謂：「鄭敬基嚟咗，做咩唔拉住我，鄭敬基坐喺邊？」但其實他指的是鄭中基，場面尷尬，子華一時甩轆，老貓燒鬚。

子華前晚換兩套衫。