歌手蘇永康同黃子華老友鬼鬼，囝囝Jazz仲同子華上咗契，子華非常愛錫契仔，除咗講過想做兼職陪月湊Jazz外，子華仲送過富格林金幣畀Jazz，真係錫佢錫到燶！

最近子華開騷，蘇永康同Jazz當然要去捧場啦，兩父子仲自備「契爺」燈牌到場，之後蘇永康將一家三口同子華嘅合照放上社交網，相中嘅子華瞪大對眼表情趣怪，而Jazz就天然呆唔望鏡頭，蘇永康留言話：「因為個Show講到明『兒童不宜』所以契仔都冇得睇，惟有早啲到紅館等契爺化妝整頭時Jazz可以周圍玩！一開Show守規矩地立即上車回家！ps：老友第十場你仍然狀態大勇！堅佩服」。

蘇永康一家三口到後台為黃子華打氣，仲自備「契爺」燈牌。