黃子華連開26場嘅最後一次棟篤笑「金盆浪口」，吸引唔少圈中好友捧場。不過，前晚其中一位到嚟睇騷嘅好友，就令子華勾起好多往事回憶，一時間喺後台喊到失控。

而呢位好朋友，原來係同子華識於微時嘅林祖輝，子華每一晚都係喺台上多謝祖輝，因為對方喺佢第一次開棟篤笑時仗義相助，當時嘅子華因為擔心銷情慘淡而到處貼街招宣傳，其間更講到哽咽。子華冇諗到對方突然嚟捧場，所以一見到祖輝就挨喺佢肩膀，忍唔住流下男兒淚，之後仲要用紙巾拭淚。喺後台等影相嘅嘉賓，好似邱淑貞夫婦、陳法蓉及名媛黎曉靈（Kimmy）等都被呢幕感人場面，搞到唔識畀反應。

林祖輝接受傳媒訪問時話：「佢話最後一次騷，會諗番最後一次點準備，因為頭一段時間都有幫手，佢諗番成個棟篤笑，有啲回憶，所以好感動！」有指當年仲喺由祖輝幫子華去紅館攞表，申請文化中心個場，佢哋又一齊度棟篤笑個名，連沙士期間開騷，祖輝仲幫手喺門外派口罩畀觀眾入場，真係難兄難弟。

Kimmy喺朋友圈分享相片後留言：「男神不忘初心感動落淚了！與女神們一起去看我的男神。從自己貼街招拍（怕）沒有人來，到現在一票難求，實在為你的堅毅驕傲」。Kimmy接受《蘋果》訪問時話好感動：「我哋約咗成班女神一齊去，我係好鍾意黃子華，咁啱江希文同子華拍過《男親女愛》，我又同江希文friend，難得最後一次，所以一齊去睇。反而祖輝我唔識，但子華係完全唔知佢喺現場，但聽講好似話26場都咁多謝祖輝，仲話記得貼邊條街，上演一幕難兄難弟。有人低潮幫你好難，但成功仲記得嗰個人，係仲難，所以佢係男神！」

子華究竟見到邊個喊得咁犀利？！

好少見男神咁肉緊，攬到對方實一實。

原來係林祖輝…

子華同祖輝識於微時，子華第一次開棟篤笑，祖輝都有幫手貼街招。

子華流下男兒淚

要祖輝再三安慰

喊到停唔到

要攞紙巾

名媛黎曉靈（Kimmy）話由《男親女愛》開始已經鍾意對方。

唔少圈中好友都有去捧場。