黃子華為谷新劇，不但許諾收視破40點請睇棟篤笑，更當眾與林嘉華上演一幕「斷背情」，十分亢奮的子華，還揚言可為李安露蛋。

黃子華、葉童、林嘉華等《奸人堅》演員，昨日在香港仔海鮮舫做宣傳，期間子華、林嘉華與手下，分別乘坐兩艇醒獅採青，爭奪淑女葉童歸，結果兩猛男雙雙勝出，但子華需戴上鳳冠接受祝賀，林嘉華忍不住錫了這位「新娘子」一啖，即惹得其他演員起哄，要求二人嘴對嘴錫，嚇得子華急急以手掩住林嘉華嘴部急錫一啖蒙混過關。

開收視期票
在預祝收視成功時，子華承諾若有四十點，即請所有台前幕後看他十二月的「棟篤笑」，甚至消夜直落。

對於此劇收視，子華十分睇好：「四十點係基本嘢啦，好似依家恒生指數咁，一浪高於一浪，（係咪好有信心？）只係睇第一集，唔會唔睇完個劇，畀一個機會我，十月八日一個鐘。」問到之前被林嘉華錫錫可有尷尬，子華笑言心情太亢奮以致沒有太大感覺，還直言是第一次被人攬住錫。

隔手咀失望
至於主動錫子華的林嘉華，他坦言為了新劇乜都做：「如果收視好，我就真咀子華，幾多點就錫幾耐，頭先隔住隻手，真係失望。」及後聞得林嘉華有意真咀，子華笑笑說：「我唔同結咗婚嘅人搞呢啲嘢，佢搞好佢嘅婚姻關係先啦，我唔能夠低估自己嘅能力，搞歪咗佢，我係李安fans ，每個人心中都有座斷背山，佢（林嘉華）有佢斷背山，我有我色戒，如果李安搵我拍戲，我露皮蛋都得，我只有皮蛋，冇蛋蛋。」

對於兩個大男人玩錫錫搶晒風頭，葉童並不介意，始終此劇以奸人堅及黃飛鴻為主角，又笑言：「佢哋想做呢樣嘢（錫錫）好耐啦，只係搵到藉口完成心願啫。」

黃子華在艇上展示纖幼「毛腿」，他形容其靚腿女性見到都會流口水。

「奸人堅」與「黃飛鴻」承諾收視好，會真錫答謝觀眾。

林嘉華忍不住輕吻子華，但後者竟然太亢奮沒感覺。