現年55歲嘅黃子華一直都係香港人心目中嘅男神，無論係男士定女士，都俾佢把口征服，每次佢開騷都係要搶飛，如果平時有機會見到佢，梗係要望多兩眼啦。

日前子華神以一身全黑西裝、戴住黑色闊邊帽、心口仲插住朵花咁喺銅鑼灣時代廣場出現，原來佢係幫一間酒窖做剪綵嘉賓，《蘋果》讀者楊小姐透過「爆相爆片」，影低咗男神坐喺Starbucks同朋友傾偈嘅相，佢話當日晏晝3點左右，時代廣場9樓忽然好墟冚：「後來見到黃子華同幾個人坐咗喺Starbucks度傾偈，有幾個人攞啲長腳杯畀佢哋飲。」

楊小姐話見到有間酒窖開幕，男神應該係剪綵嘉賓，佢話自己同身邊朋友都係男神fans，所以即刻攞起手機影相。不過你有你影，有大陸遊客就唔識貨，識唔出子華神就喺身邊，楊小姐仲話聽到有對自由行夫婦嘅對答，太太問老公：「好多人，在做甚麼？」明顯就係有眼不識男神。

子華神坐喺個咁開揚嘅地方，就梗係墟冚嘅。

子華幫完酒窖剪綵，心口中朵花唔捨得放低。

有職員仲拎咗啲酒俾子華同朋友邊飲邊傾。