黃子華在《棟篤神探》飾演的「莫探員」口齒伶俐，令觀眾留下深刻印象，但在另一部新劇中，子華卻刻意收起他的天賦，扮演口吃及患讀寫障礙的鄉下仔，認真考演技。

吳鎮宇和黃子華曾為無綫拍劇，而且創下收視佳績，最近兩位猛男更攜手合作，聯同陳慧珊拍潘文傑的內地劇集《大亨》，其中子華飾演的數學天才，同時患有讀寫障礙，真正是「天才與白癡」只差一線，角色十分突出，子華坦言甚具挑戰性。

搵盧冠廷教路
為了在形象上有更大突破，子華費盡心思，更想出絕橋，一洗以往伶牙俐齒的本色，反而要扮口吃，且將頭髮剪成鄉下傻仔般。事實上，子華這個角色性格豐富，為此，他在工作人員協助下，聯絡曾患此症的盧冠廷「攞料」，原來盧冠廷小時候患此症時，只是寫字有困難，及後作曲得靠錄音機和電腦協助。

對於這個角色，子華覺得最大難度是既要自我，又要有顆樂於助人的心，他笑說：「都幾矛盾，我以前做戲窒人窒得好開心，依家角色傻傻哋……但都有得窒嘅，不過就冇心嗰種囉！所以都有笑位。（有冇叫盧冠廷教路？）佢啟發咗我好多，佢唔識寫字嘅，冇令佢失自信，因為呢種人一定有另一種才華，盧冠廷話畀我知，原來佢好打得嘅！」