黃子華在聖誕節流流為無綫新劇《棟篤神探》開工，仲差點被羅莽之菜刀劈中，嚇到一額汗，好彩只是有驚無險，並沒有掛彩。

「神探」子華前日到九龍城街市拍攝辦案戲，因為「豬肉佬」羅莽受了刺激，攞把菜刀斬人，子華遂帶同一班手下去制服羅莽，殊不知捉得住羅莽個人，卻捉不實羅莽把菜刀，成把菜刀直飛向子華，嚇到子華腳仔軟。

有藉口唔送禮物
子華在今個聖誕節每日都開工，完全都沒有感受到節日氣氛，他更乘機借開工做藉口，一份聖誕禮物都沒有送畀朋友。

子華笑說：「聖誕節送禮物，呢啲係資本主義嘅發明，都唔係耶穌發明嘅，如果係耶穌叫到我咪做囉，所以聖誕禮物呢回事，得閒嘅咪送囉，唔得閒就梗係唔使送啦。」子華這個藉口，相信連女朋友都無得詐型。

試過忍不住睡著
子華拍攝《棟篤神探》，原來一點也不辛苦，平均每日都有八小時睡覺時間，雖然全劇拍攝時間拖長了，但他一點也不介意，認為每日精神奕奕開工最理想。

原來此劇開拍初期，亦嘗試過日接夜、夜接日之艱苦拍攝日子，子華難以適應，曾試過在拍攝期間忍不住睡著了，要勞煩導演叫醒他，都算搞笑，所以子華認為有覺好瞓最重要。