無綫劇集《棟篤神探》上周播出大結局雖然有卅九點的最高收視，但劇中「莫探員」黃子華一命嗚呼卻犯眾怒，引起觀眾極大回響，無綫和影視處接逾卅宗投訴。為此，無綫順應民意，昨晚在「娛樂大搜查」安排另一個happy ending的版本，交代「莫探員」死而復生，捉完賊仔後開開心心與「李慧慧」蔡少芬影婚紗相，又加上「從此莫探員同慧慧就幸福快樂地生活落去喇…？！」的字幕。不過身為主角的子華在錄影廠睇完新結局版本，竟然抵死話：「肯定畀人鬧得仲勁。」似乎不願意復活，而監製徐正康一樣好鬼馬：「字幕最後又問號又感嘆號，佢哋係咪真係咁幸福就要觀眾自己諗嘞！」

子華又說：「係咪想happy ending我自己都掙扎，喺創作上當然想嘗試唔同嘅嘢，喺人情上又真係好淒涼，覺得莫作棟好可憐，好似隻狗咁死喺街，側邊冇人冇物，搞到我拍完嗰場戲都好難受好hurt，拍到喊咁滯。」

他並且玩踢爆說：「唔係兩個結局，係之前播短啲，而家播埋後面長啲，睇吓觀眾鍾意邊個。」

不傾向拍續集
對於被指他的結局樣無笑容完全不幸福，子華立即開玩笑：「因為啱啱搞掂（捉賊仔），仲未驚完，要抖番順條氣。而且趕嚟途中遇到個仲靚嘅，可惜冇得返轉頭。」

此外，子華昨晚遲了半小時入廠，原來與無綫製作部副總監（戲劇分部）曾勵珍會面，但就沒正面回答是否傾拍續集問題：「都係討論吓將來啲可能性，我本身一向唔傾向拍續集，係都做新嘢，但世事難料，好似今日咁，套劇完咗，都有啲咁嘅事發生，證明好多嘢係預測唔到。」