正於紅館搞告別棟篤笑的黃子華，前晚獲多年好友林祖輝現身撐場，返回後台時，毫不知情的他一見到林祖輝探班，即感動得流下男兒淚，場面動容。

黃子華近日假紅館舉行最後一次的棟篤笑《金盆浪口》，吸引不少圈中好友捧場，前晚有邱淑貞夫婦、陳法蓉、江希文等，跟他識於微時的好兄弟林祖輝亦有現身。然而，子華每一晚都會在台上多謝林祖輝，又憶述第一次開棟篤笑時，因擔心銷情慘淡而到處貼街招宣傳，哽咽表示幸獲對方仗義幫忙。
回到後台之際，驚見林祖輝來探班的子華即上前攬實對方，隨即激動到靠在林祖輝的膊頭上爆喊，之後還要紙巾拭淚。事後，林祖輝接受傳媒訪問時說：「我都未見過佢喊！未講嘢都震晒，完咗諗住打個招呼，佢唔知我喺度。」他又坦認子華的處女棟篤笑，是自己幫手去紅館攞表Book場，當年兩人又一齊度騷名、漏夜出去貼宣傳海報，自己不覺辛苦；及後沙士年代，更親自企門口派口罩給入場觀眾，朋友就是互相幫忙。

大概是勾起了多年共患難的回憶，令黃子華一路喊不停。

在後台見到林祖輝來探班，黃子華即激動到當場灑淚。

黃子華獲老友林祖輝（左）撐場，兩人更於後台合照。