子華講完「錫嘅制度」可以避過愛情最大嘅陷阱—「一見鍾情」，不過香港人除咗愛情，可能更多人鍾意寵物，尤其是狗，子華話：「咁mary就會講，你講咁多即係你唔可以愛，你唔愛得唔緊要，我有旺財，對旺財嚟講愛係冇難度，大家都知，我示範畀你睇，阿旺財，你睇下，嗌佢一千次都好似第一次咁，係永遠保鮮旺財，旺財你愛唔愛我，佢會搖尾。旺財你為我可以去到幾盡，佢會兇起個樣。

依家好多人愛狗多過愛人，大家都知，你同個拖友行街你都想佢行㗎，我上次行街，見個女人推架嬰兒車，我望一望，你個B都算醜樣，成隻八哥咁樣，佢真係一隻八哥，做咩佢病呀？黐線，我哋撐檯腳，我哋去狗餐廳，飲狗好酒呀，阿旺財唔好再飲啦，飲到眼都凸晒出嚟。佢係八哥嚟架。死唔死飲到嘔，出街嘔，順便痾埋，人痾屎蝗蟲，狗痾屎，有冇蟲呀？

你知唔知有狗殯儀，我真係唔知佢點攪家屬謝禮，八哥走嚟叩頭，咁你搵九哥去招呼佢呀，點夠輩份，九哥九哥呀，八哥嚟咗呀。（全場笑，子華也不停笑）

子華續說：「做法事去超渡隻狗，超渡人我就知咩事，即覺得希望佢下世好啲，今世做乞兒，下世做飛機師，想高級啲，咁點為之高級啲嘅狗。」

子華就喃嘸佬音唱：「旺財來世呢，八哥變金毛呀，哎呀金毛高級好多識得尋回，唔知尋回乜嘢呀，金毛尋回再高級啲變洛威拿，又快樂又威呢，但係隻乸喎，再高級啲旺財變貴婦，貴婦擺明高級，仲要男貴婦，雌雄同體呀，嘩好高級，最高級呢係呀…係呀變做…貓。」

子華繼續說：「大家咁愛動物，大家有冇諗下若果有日隻狗出櫃，返屋企見隻狗對住你（深深吸一口煙），跟住話Dad，我識講嘢架，但我因為愛你，所以我驚嚇親你，我就一路汪汪汪好白痴咁，而每次見條友行過門口就出去吠佢，我識佢架，我係扮比你睇。

今晚我飲咗廁所水，我知道我哋冇可能，人狗殊途，以後我仍然爬喺地下度飲水畀你睇，but i want you to know i all do it for you，係我仲識兩三種外語，so what，以後我仍然會唔著褲落街大小二便，請你唔好再催我，想像下如你去大小異便有個人拿張報紙喺你後面，我嗰個係一個消化系統，唔係一個發射器呀。好可惜我哋以後唔可以再一齊游水，我驚我忍唔住畀人睇到，我其實係識背泳。

I am a Problem，我知我係一個問題，其實冇事，你帶我去獸醫度剪咗我條聲帶，一齊回復正常，第一你打咗麻醉針之後，唔好順便閹埋，我知你習慣，有八折你忍唔到就順便，閹唔好順便，第二要求，我想我仲有聲線時唱首歌你聽下。」

跟住子華背上結他自彈自唱英文歌Jack White作品《Love Interruption》，獲全場叫好。