Fans高空叫偶像險象環生 黃子華一出裝修工失魂

2000年6月22日 | 蘋果日報

黃子華、吳鎮宇和張達明揹飛演出的《鬚根Show 2》昨日宣布加場,子華等人在天台拍照時,隔籬大廈吊在半空的裝修青年,竟隔空「發功」,大嗌子華的名字,險象環生,足證子華魅力驚人。

黃子華、張達明和吳鎮宇合演的《鬚根Show 2》,果然來勢洶洶,首三十九場的門票,甫發售即告爆滿,「鬚根三子」子華、鎮宇及達明,昨日在彌敦酒店開記者會預祝之餘,還即場宣布加開二十場,索性「盡地一煲」演出五十九場。

達明謂:「其實之前都有諗過加場,不過冇諗過啲飛真係去得咁快,今次做完五十九場就唔會再加,我哋三個亦唔會再搞鬚根Show,所以今次真係好抵睇㗎!」

不只迷倒女Fans
雖然《鬚根Show 2》將作「終極演出」,但相信三子都絕對不愁去路;尤其近日人氣急升的子華,原來不只迷倒少女與「師奶」,就連「蠱惑look」的年輕工人,亦拜倒於子華的魅力下。

「鬚根三子」昨日在酒店天台拍照時,就引到對面吊在半空的一名年輕裝修工人大嗌子華過來,他說:「黃子華黃子華!」子華開心之餘亦即報以一句「小心啲呀!」場面惹笑非常。

該名裝修工人,叫完子華後,又大嗌「靚坤」(即吳鎮宇),並懸空大聲問鎮宇:「有邊度好玩呀!」吳鎮宇即笑說:「去芬蘭浴沖涼囉!」