《My盛》結局率先爆 「教主」 重口味新娘裝曝光 視帝子華︰呢次真係好勇

2013年12月19日 | 頭條日報

《My盛Lady》成為史上第一套劇集,未播完男主角黃子華和男配角許紹雄分別奪得「視帝」和「最佳男配角」,子華更成為史上唯一唔出席頒獎禮,依然有獎攞的「視帝」。又難怪該劇在頒獎禮有好成績,子華一出連網友都話暫停熄機行動,明晚劇集將播出大結局,剛剛出場的蝦頭(楊詩敏)在徐子珊 手上明搶「教主」,兩女爭一男最後結果會點?本報獨家獲得結局劇照,子華以重口味的新娘裝現身,出爐「視帝」子華無奈說:「呢次個造型真係好勇㗎!」咁搞嘢唔通「新郎哥」真係蝦頭?

視帝子華表示扮女人以往在舞台劇都試過,但扮新娘確實是首次嘗試,「 呢次個造型真係好勇㗎!本嚟為咗配合番個角色咁潮又咁貪靚,想再扮得認真啲,但係時間唔夠,件婚紗仲可以再靚啲。(聽講件婚紗本嚟係Deep V,但你專登加層紗遮住喎?)見到成排肌肉唔係幾好,唔想太重口味!」

「盛女」「野獸」之爭
造型上子華只穿上女裝,但沒有化妝配合,原來是劇情需要,「因為呢場戲講,對方要我着婚紗先肯結婚,我為咗證明有幾愛佢先咁着,唔係為咗想扮女人,所以唔需要化妝。」邊個有幸成為「教主」的最愛做得成「新郎哥」呢?子華就大賣關子,「正常男人都寧願揀『盛女』子珊,都唔會揀隻『野獸』蝦頭啦!我只可以講自從蝦頭出場之後,呢套劇會進入瘋狂狀態。」

蝦頭一出場已相當出位,一身紅番裝飛撲攬住剛咀完子珊的子華,相當飛擒大咬,完全表現角色佔有欲強的一面,子華大讚她是好演員,「佢係香港頭三名嘅喜劇女演員,我哋認識係當時《男親女愛》舞台劇佢做副導演,但嗰陣時我唔知佢識演戲,後嚟睇佢做獨腳舞台劇《求戀期Q娃》做得真係好好。今次係監製提議搵佢,我只係負責聯絡佢啫!」

慘被「野獸」強吻
早前強吻過陳敏之 的子華,將有被蝦頭強吻的戲份,子華即抵死地形容,「真係覺得好凋零,佢嗰一陣狂風掃落葉式嘅吻,真係好狂野,配合番佢野獸嘅表現,做番動物要做嘅嘢,不過係我鼓勵佢去盡啲嘅,因為照劇本嘅去法,絕對可以咁瘋狂。」

對於首次拍劇便拍着「視帝」子華,蝦頭都相當回味,「子華佢打畀我時,我以為佢講笑咋!我一直當佢係偶像㗎,嗰陣時佢當面讚我個舞台劇做得好,我真係感動過上台攞獎呀!嘩!一個殿堂級笑匠讚我喎!今次可以同佢第一次合作,真係好開心!佢教識我好多嘢,佢同監製都畀咗好大創作空間我,今次角色好似幼稚園教師嘅職業都係由我設定。」

wnep110p01a_mi

盛女之吻 ※「教主」扮晒牛扒?Jennifer,還上演一幕街頭濕吻。

wnep110p01b_mi

重口味新娘 ※子華這個重口味新娘,當然唔係咁多新郎哥啃得落。

wnep110p01c_mi

野獸之吻 ※Laura強吻「教主」,被子華形容為「凋零」的一幕。

wnep110p01d_mi

大騷長腿 ※子華唔肯着DeepV婚紗,卻露出一雙修長美腿。

wnep110p01e_mi

子華成為史上首位沒有出席頒獎禮的「視帝」。