【搶先睇】黃子華講11萬票房《一蚊雞保鑣》「咁有趣但最後仆成咁」

2013年12月27日 | 蘋果日報

本報聽日有黃子華專訪,依家娛樂即時率先送上精華節錄,訪問入面除咗講到子華套新劇,亦都有講及佢02年一套只有11萬幾票房嘅電影《一蚊雞保鑣》。

講到無綫近年嘅劇集質素同收視唔突出,連有收視保證嘅子華套《My盛Lady》就被寄予厚望,不過對於子華而言,收視多同少都一樣搏命,佢就話:「我係想演好嘢畀觀眾睇,做唔做到一件事,每次盡力做,唔理氣候係點,我係試過拍《一蚊雞保鑣》嘅人,用咗好多心機,裏面有咁有趣嘅嘢,但最後仆街仆成咁!」

子華所講《一蚊雞保鑣》入面嘅有趣嘢會係啲咩呢?會唔會係女演員呢?當以「士碌架」造型演出嘅嘅靚女郭羨妮,嗰時女演員又百花齊放,子華都揀咗郭羨妮,好有可能郭羨妮就係子華所講嘅有趣嘢,戲入面除咗有郭羨妮之外,仲有一身學生妹造型嘅陳自瑤,都有可能係有趣嘢。數到女演員又點可以唔提苑瓊丹,佢同許紹雄喺戲入面以夫婦身份,唱出「經曲金曲」《不灰鞋》,今時今日都肯定仲有人記得(雖然可能係負面),其實呢首歌,係咪子華自嘲自己「不詼諧」呢?

如果唔講女演員,就講吓其他演員,當中一個「木村」Kimura就最令人深刻,「木村」一出就因為造型太過出位,先畀子華打咗一牶,呢位「木村」真身叫鄭道駿,子華所講嘅有趣嘢唔通係呢一位?

1388154527_104b

《一蚊雞保鑣》 當年票房得11萬,無聲無息上咗5日,但之後睇返嘅人,肯定更多。

1388154533_8ee3

比學生妹陳自瑤騎喎,不過戲入面子華係俾佢虐待嘅。

1388154543_eda5

點解當年子華可以度一套咁嘅戲?