一連35場、由黃子華、陳法拉主演的舞台劇《前度》未開演已掀撲飛潮，該劇前晚首場公演，兩人齊齊拋開男神及女神形象連環爆粗，子華更將棟篤笑式金句融入對白當中，道盡撕裂中的香港；法拉更豁出去「性女」上身，與子華不乏攬攬錫錫場口！本報記者

黃子華及陳法拉主演的舞台劇《前度》前晚正式公演，吸引不少兩人的圈中好友捧場支持。《前度》劇情講述法拉飾演的「小三」與扮演白手興家的飲食業大亨的子華拍拖六年，她更「融入家中」跟子華的妻兒熟絡，惟遭子華老婆揭發戀情後便告失蹤。三年後，子華跟法拉重遇復合，但最終仍因價值觀不同而分手收場。

金句發人深省
《前度》雖改編自英國著名舞台劇《Skylight》，劇本除保留原著道盡兩性的愛情觀外，子華亦貫徹其棟篤笑風格，加入不少香港政治議題、階級觀念，及兩代之間的矛盾衝突，雖然金句不及棟篤笑般密集，但依然發人深省，其中子華寸爆紆尊降貴到上水Band 3學校教書的法拉只是想扮「觀世音」普度眾生：「如果你同我一樣出身寒微，就知搭巴士根本無乜嘢學！」

而子華在劇中亦恃着白手興家，經常肆意批評「兒子」劉俊謙，更批評年輕人似外星人，「年輕人無嘢叻，最叻係否定一切，佢（兒子）唔係叫我老竇，係叫我腦殘、喪屍，話我乜都唔理，一味掛住搵錢！」子華的對白不乏粗口，及至中段的喊戲及尾段的發爛渣戲亦揮灑自如，讓人拍案叫絕！他謝幕時有感而發道：「今（前）日第一日公演，好多人發達啦！我係講黃牛黨，其實咁又何嘗唔係悲劇呢？」

法拉緊張食螺絲
反觀首度演出舞台劇的法拉在演出初段表現略為緊張，咬字不正及屢食螺絲，幸好愈演愈順，順利完成喊戲。法拉更放下女神形象，爆粗做「性女」與子華大談「性經」，她說：「執多劑？你咁快得喇咩？」扮演老師的她又自爆遭學生以20元紙幣掟面羞辱：「佢（學生）同我講：『教乜X嘢書呀鬼婆，幫我打飛機啦！』」對教育充滿熱誠的她最後更鬧爆社會輕視教育工作者及社工道：「X街，你哋知唔知社工做緊乜呀？通緊渠呀！掃走一啲你哋喺社會上面扮見唔到嘅嘢呀！」演出甚為破格，讓人大感驚喜！

子華與法拉劇中扮演情侶，少不免有親密感情戲。

子華與法拉雖深愛對方，卻因價值觀不同而分手。