人氣組合 —— Miss Mo 鄭裕玲加阿 Lok 黃子華組成《男親女愛》，播出僅僅一個月，收視由首播三十一點攀升至三十四點，連人帶劇，勁收旺場，二人對今次人氣急升，原來背後心態各走極端，有人歡喜有人悲……

嘟嘟說：「受歡迎梗開心啦！但最重要係達成我多年來心願……扮靚啦、準時返工放工啦……」

子華說：「紅？名氣？無好過有，名氣太大太響，只會帶畀我更多唔方便！」

黃子華：名利好煩

一入侯門深似海，做娛樂圈，藝人必需要有名才有利，但黃子華對名氣卻抱非常抗拒態度。

「名氣於我個人而言，確係好唔方便，或者我真係好應該放多啲時間去適應，點樣可以利用自己嘅名氣。」

「曾經睇過外國影星積尼高遜一篇訪問，內容提到另一位演員 Sean Pan（辛潘）好唔鍾意自己名氣，積尼高遜話：『名氣，只要用得其所，你就可以駕馭名氣，並非名氣壓着你！』呢個學問好高深，我係另一種極端嘅人，而我又睇到某啲人被自己嘅名氣迷咗！你話名……點樣可以掌握得好啲呢？」

後悔坦白
正因為太介意自己被人認識，這份無形壓力，令子華內心矛盾不堪！

「好後悔初出道時，傳媒問乜都照講，如果今日有人問我，我會答：『黃子華？係石頭爆出嚟嘅！』」

「知我在邊度嚟？無意思，最近睇完一部西片《美麗有罪》，入場之前有朋友同我講，男主角係『基』嘅，但戲裏面，男主角有老婆、有個女，我聽啲朋友講，受影響，愈睇愈覺得男主角好『基』！演員須要有形象，我唔想因為私人生活影響演員身分，所以最好盡量低調，保持神秘，尤其是私人感情更加要保護，避開外界無謂嘅評價。」

沒有期望
「今日成功，下一步點做？將來嘅嘢我唔諗，我係見一步行一步嘅人，做人最怕期望過高，失望愈大！」

為避開殘酷的現實，花無百日紅的道理，儘管有朋友提醒他是新一代「師奶殺手」，又或是一窩蜂的說他紅了，他亦堅持抱一種態度。

「我需要一個自由空間。」子華對個人問題愈縮愈窄，提到愛情，他答得似是而非，令人無從入手。例如問他這樣忙碌，豈非無時間見女朋友？「唔單止女朋友，重無時間見任何人！問愛情呀？每人各有一套不同嘅愛情觀囉，有啲人要對方每日畀三次電話先至算愛，但有啲又唔係，好難講，要視乎組合。」

只談工作
答得如此虛無飄渺，等於無答，轉問他的工作，子華即滔滔不絕。「日日朝八晚七，一星期七日開足工，返到屋企已經累到要上床瞓，但瞓覺之前腦海又自然諗翌日嗰場戲應該點做，根本連個腦都無時間休息。」

「你知道嘛？我唔可以去得咁盡，好易無精神，當務之急，只想有時間好好休息，好好充電。」

我係咪一炮而紅？
「呢個劇出街唔夠一星期，有兩個廣告搵我拍，有人話：『我係師奶殺手。』有次去間學校對面拍外景，成街學生圍住我，令我開始感受到拍電視劇嘅威力，算唔算一炮而紅？唔知呢！」

戒煙兩日
「受嘟嘟影響戒煙？又唔關事嘅，我少食？係因為去唱卡拉 OK 嘅時候，喉嚨發炎，咪試下戒囉！……兩日無食嘞！」「戒唔戒到？」「未知㗎，要過多一年半載先至知！」

子華最憎女人……

（一）「唔清潔嘅人，即係污糟！」
（二）「唔識講嘢、又學人講一餐。」
（三）「覺得自己好靚嘅女人，恃靚行兇。」
（四）「無理取鬧。」
（五）「愛認叻，講嘢又巴巴閉閉。」
（六）「過分迷信，例如今年無去拜神『借庫』，自己唔開心又影響他人唔開心！」
（七）「懶惰，成日諗住靠人養。」
（八）「不負責任嘅人，遲到早退，不理會別人感受。」
（九）「自以為是，又唔知自己嘅能力去到邊！」
（十）「階級觀念重，又鍾意見高拜見低踩。」