大台早前喺深宵時段重播《男親女愛》，令大家好期待阿Lok（黃子華）同Miss Mo（鄭裕玲）呢對經典組合重遇，日前《男親女愛》演員蔣志光、陳彥行、鄧健泓等一齊食飯聚舊，有傳飯局上子華提議拍番5-10集《男》劇外傳，等大家開心吓。然後Do姐喺電台回應就冇落晒閘，但直認好難。

劇中飾演「仙姐」嘅苑瓊丹因為唔喺香港，所以當晚冇現身飯局。苑仔今日接受《蘋果》電話訪問都覺得有難度：「我覺得冇可能囉，但如果真係拍都唔會拍好長，因為佢哋兩個（黃子華、Do姐）都忙。不過套戲真係好有翻拍嘅潛在價值，早排好多人見到我都話追緊，依家睇番都話唔夠。」

苑仔剛加盟湖南衛視嘅芒果影視，來年重點發展內地市場，佢話：「芒果TV都有自己製作，我嘅期都排到明年中，徐正康（監製）都未approach我，當大家講吓去處理。」問到15年後可擔心唔同樣？苑仔信心十足：「冇走樣，我向來有做針炙保養，依然保持美艷動人。」咁想唔想同毛教授（胡楓）開花結果？苑仔搞笑謂﹕「修哥人見人愛，車見車載，我梗係想對住佢啦！」

而子華亦都有回覆話：「一班人聚舊食飯，幾好玩，真係有講過吓，但真係只係講咗幾分鐘，成餐飯主要係聚舊。要落實唔係一件容易及短期內發生嘅事。」會否是明年底？子華話：「唔會咁易做到，唔會有一個實在時間表。」

當晚有去飯局嘅「行姐」陳彥行受訪表示:「其實15年嚟無間斷都話開拍，但應該都係吹水多，因為真係要睇兩位大忙人個期。」

（電視圖片）