佘詩曼噚晚出席《微博之星》拎咗「最具影響力藝人」，仲憑《使徒行者》獲女主角獎，阿佘話好開心因為角色受歡迎，之前冇諗過劇集可以搬上大銀幕，講到會唔會多啲返大陸做嘢？阿佘坦言：「如果有人邀請都會做，不過呢一輪少啲，因為仲同緊子華拍嘢，仲有一個月要拍，但係開心嘅合作。」

阿佘同黃子華喺新片《棟篤特工》要針鋒相對，成日被子華恰、互相鬥氣，阿佘仲爆喺戲中要打子華，試過有次真係要用真力打佢，阿佘話：「有一幕佢要濕身同倒吊，我要打佢一巴，當時見到佢咁樣倒吊，當日天氣咁凍得12度，覺得佢好慘，好似好殘忍，點知拍完，導演話穿崩再嚟過，子華要求用真力打，打完之後，我都覺得自己真係好大力，子華就話情願一take過，真係唔想NG，跟住嗰吓，真係真摑落去。」