吳鎮宇母親眼見兒子成家立室，心情固然興奮，昨日記者問她送甚麼給新抱時，吳母笑說：「送咗一隻周大福嘅金手鐲囉！」昨日出席鎮宇婚禮的賓客約有四、五十人，其中擔任伴郎的黃子華，表示自從劉青雲結婚後，已不再送賀禮給朋友，他解釋說：「青雲結婚嗰次，我送咗張輪盤枱畀佢，點知佢一次都冇用過，自此之後我決定送現金，實際啲。」

秋生錄影送祝福
張達明昨日做戥穿石之餘，更充當鎮宇的婚禮攝影師，負責拍攝婚禮的錄影帶，達明說：「我之前喺北京拍戲，用呢部攝錄機拍低好多老友嘅祝福語送畀鎮宇，好似黃秋生同劉德華咁，留番今晚婚宴上播畀鎮宇睇。」至於跟鎮宇同一經理人公司的陳法蓉、蔡少芬和郭可盈，亦有委託經理人Helen向一對新人送上祝福。擔任姊妹的黃卓玲則表示，送了一套刻有名字的銀器給鎮宇及Fiona作禮物。