搶親背咀嘴連場 黃子華甘為李安獻皮蛋

2007年10月4日 | 太陽報

黃子華孭重飛的劇集《奸人堅》於下周首播,為谷收視子華不惜借熱爆電影《色,戒》造勢,擺自己上枱,他說:「如果李安搵我拍戲,我露皮蛋都得!」果然夠出位!

無綫新劇《奸人堅》備受注目,昨日在宣傳活動上,子華與林嘉華分別乘坐兩艇醒獅採青,爭奪葉童,結果打成平手!子華戴上鳳冠接受祝賀,林嘉華更吻賀戴上鳳冠扮新娘子的子華,現場即時起哄,大叫兩人咀嘴,子華即時以手相隔,才接受林嘉華獻吻。

林嘉華事後承諾收視有四十點才表演「真咀」,子華笑說:「我唔同已婚嘅人搞呢啲嘢,等佢搞掂婚姻關係先搵我!我唔低估自己能力,唔想搞歪佢!」子華更自稱是李安的Fans:「每個人心中都有個斷背山,林嘉華有佢嘅斷背山,我有我色戒!如果李安搵我拍戲,我露皮蛋都得!我只有皮蛋,冇蛋蛋!」

提到收視,子華承諾若有四十點,便會請所有演員欣賞其十二月的棟篤笑,問到預計收視多少,他說:「好似恒生指數咁,一浪高過一浪,好容易創新高。(好有信心?)只要睇第一晚,就唔會唔睇完套劇,大家畀一個機會我!(林嘉華錫你塊面?)唔覺,可能太亢奮,第一次畀人攬住錫,第一次通常冇感覺!」

葉童不介意被搶風頭
此外,葉童對於兩位男主角大玩咀嘴,表示不怕二人搶鏡,提到收視理想兩人會「真咀」時,她笑說:「佢哋想做呢樣嘢好耐,只係搵個藉口完成心願!」另外,楊秀惠出席活動前搭的士買湯水,落車時不慎仆倒,手睜及腰位受傷,她表示當時很尷尬,擔心被狗仔隊偷影。

無線收視福將
自99年起,黃子華為無綫拍劇,繼《狀王宋世傑II》後,由他擔正主演的《男親女愛》及《棟篤神探》收視都屢創佳績。

《男親女愛》
00年初,與「緋聞絕緣體」DoDo拍《男親女愛》傳出緋聞,此劇除了以48點打破當時的收視紀錄外,更於年底將劇集搬上舞台,成為大熱話題。

《棟篤神探》
03年底與蔡少芬合作的《棟篤神探》,以最高的39點成為當年收視之冠。但結局卻惹來83個投訴和不滿,無綫特意拍下完美的結局向觀眾交代。

se03100414_big

黃子華(左)乘坐小艇醒獅採青,場面熱鬧!