陳法拉返港賣力當「暑期工」，演出舞台劇「情挑」黃子華，當眾爆粗之餘更將性事擺上台，演出豪放令觀眾刮目相看。原來當初子華力邀法拉合作曾一度食檸檬，法拉連男神亦冇面畀，認真有性格！

法拉與子華合演舞台劇《前度》早前掀撲飛熱，前晚在一票難求下正式公演，吸引不少圈中人捧場，觀眾情緒高漲。兩個多小時的演出中，法拉放下昔日女神形象，與子華鬥爆粗，扮演曾於外國教書的她談起男學生的態度，竟不禁說：「佢哋同我講：『教乜X嘢書？幫我打X機啦！』」她又挑逗子華說：「執多劑？你係咪咁快（回氣）先？」對白內還不時夾雜「ShXt」、「FuXk」等字眼，大膽度令人嘩然。

心癢癢做「小三」
《前度》改編自外國劇本，講述扮演小三的法拉與子華交往六年，分手三年後子華的太太離世，法拉一晚內竟先後與子華父子見面，各人盡訴心事。而子華為將劇本「香港化」花了不少心思，幾位主角對白「貼地」又帶出現今社會問題，不時引得觀眾會心微笑。談到今次合作，子華自爆：「當初身邊有人覺得呢個角色適合我同法拉，點知法拉竟然話要去讀書，四年後先有時間演喎！後嚟佢喺美國睇過原著舞台劇開始心癢癢，想搵人開刀練習吓，所有嘢都係巧合同緣分。」完成《前度》35場演出後，法拉將結束暑假趕返美國，為其戲劇碩士課程準備新學期的開學。

讚演出耳目一新
前晚完成首場演出後，馬浚偉、羅仲謙夫婦等到後台探法拉班及合影留念，觀眾反應有讚冇彈。阮兆祥指法拉給人耳目一新的感覺，又封子華為偶像，蔡一智則抵死地說：「點解同小三嘅關係可以親密到似一家人咁？」而觀眾陳先生不覺法拉講對白「食螺絲」﹕「咁先似一般人講嘢，好自然。」觀眾梁先生則喜歡法拉講「搭巴士睇風景」的演出，勾起不少港人的共鳴。

而昨晚的演出，則吸引郭晉安夫婦、鄧穎芝、趙碩之和陳法蓉等捧場，問安仔可有興趣做舞台劇，他說：「可能冇乜接觸，提唔起興趣，唔慣重複咁演一個戲，唔似做電視，我做咁多年，演完一個戲就放低演另外一個。」至於曾做兒歌歌手的太太歐倩怡，問到可有機會復出出碟？她笑說：「未有喎，散吓風聲先，出隻《發燒小丸子》！」

子華講到今次合作，大爆曾一度被法拉請食檸檬。

法拉與子華合演舞台劇，予人新鮮感。