黃子華與陳法拉、劉俊謙合演的舞台劇《前度》，上周五在演藝學院首度演出，由於子華已四年沒有踏足舞台，加上首次拍住陳法拉，門票一開售只須兩小時便賣晒，因反應熱烈，由最初的18場一加再加至現時的35場。因為場數甚多，吊頸都要唞下氣，故舞台劇逢周一休場，所以子華昨日便趁休假到銅鑼灣誠品睇書叉電兼輕鬆吓。為防被騷擾，子華戴帽又戴口罩作一級保護，逗留一個鐘完全無被發現，最後掃了兩本書，埋單三百幾。問到舞台劇會否再加場？子華氣若柔絲地答：「唔會喇，都幾辛苦㗎！」

《前度》改編自英國著名舞台劇《Skylight》，故事講述法拉曾跟已婚子華發生不倫之戀，二人分手多年後，子華性情大變，演子華兒子的劉俊謙便搵法拉幫手；但他們重遇後因存在不同階級價值觀和爭拗，最終還是分手收場。今次子華以舞台劇融合棟篤笑，繼續爆金句且連環爆粗；連帶首次演舞台劇的法拉，在子華帶動下亦演技大躍進，為觀眾帶來連番驚喜。

子華好攰啊
本月原定演出24場，逢周一休場，給予演員休息時間。不過黃子華放假沒有選擇留在家中，反而到書店看書。昨日下午六時許，打扮神秘的黃子華，由利園商場步行至希慎廣場，並到八樓的誠品。一入內已埋首看書。由於他時常低着頭，無人認到佢，令他可以安心揀心水書籍，心靈系及思考系類別書最得子華歡心，逗留近一個鐘，最後入手《好人總是自以為是》及《遊戲改變世界，讓現實更美好！》兩本書。離開時見到記者的子華有點愕然，但態度依然好友善：「你哋喺邊度走出嚟？」。問子華覺得法拉表現如何？一臉攰樣的他陰聲細氣回答：「滿意吖，（舞台劇爆粗觀眾覺得好驚訝，會唔會覺得香港觀眾好大驚小怪？）我哋唔係因為爆粗而爆粗，係現實嘅表現，其實已經減咗好多。」並表示演出35場好辛苦，不會再加了。

黃子華包到實，所以可以靜靜睇書，並買了兩本思考型書籍。

黃子華畀完錢，急急腳離開，埋單約三百幾。

黃子華發現記者感愕然，但仍企定定友善做訪問。

舞台劇演出首天，大班朋友如古巨基（前左一）和蘇絲黃（前右一）等都有去捧場。

兩年前到美國進修戲劇碩士課程的陳法拉，在黃子華帶動下亦演得很出色。

有指二人綵排時，因黃子華要求高鬧爆法拉，不過他們離開時又笑笑口無晒事。