非典型肺炎肆虐本港，不過黃子華昨晚如常在灣仔舉行棟篤笑。黃子華昨日六時許戴上口罩駕車到場綵排，他表示場館內都做足衛生措施，而自己在台上表演時，亦戴上口罩，不過講了半分鐘他便把口罩除下。

黃子華昨晚在灣仔新伊館舉行棟篤笑，大部份入場觀眾都做足預防感染非典型肺炎措施，自行戴上口罩，而黃子華更戴口罩做騷。

免費派口罩
黃子華昨午六時許親自駕車到場，他戴上口罩綵排。對於會否要求場館作特別衛生安排，黃子華起初說：「我哋唔會派口罩，冇咁多錢，其實知道場館都經常會清潔，每日花費都幾萬蚊。我都唔擔心，我個騷下個月重會加開四場，售票情況都好好，都唔算好大件事。但為安全起見，我今晚（即昨晚）會戴口罩上台做騷。」
其後黃子華助手接受電話訪問時說：「我哋都知肺炎好流行，我同子華商量過，決定向進場嘅觀眾派口罩，但依家口罩都好缺貨，二千幾名觀眾未必人人可以派到口罩，但買到幾多得幾多，希望做足安全措施，觀眾睇得安心啲。」至開騷時，工作人員亦有向觀眾派口罩。
而黃子華開騷時戴着口罩出場，但講了數句話，大概半分鐘左右即把口罩脫下。黃子華說：「全場係咁（指戴口罩），冇辦法，我收咗錢，梗係要搵命搏，如果小朋友冇口罩，有需要可以問工作人員拎。」

肺炎做話題
黃子華於非典型肺炎流行期間如期開騷，灣仔新伊館內都做足預防措施，例如在當眼地方張貼了告示，勸喻有呼吸感染病症的觀眾，為了減低傳播病毒的機會，戴上口罩進場欣賞表演，場館的工作人員，全部已戴上口罩。而黃子華昨晚開騷時，亦以「奪命肺炎」做話題。

黃子華昨日傍晚戴着口罩，自行駕車到會場為棟篤笑作準備。

《冇辦法，我收錢，梗係要搵命搏！》黃子華在開騷片刻已把口罩除下。