黃子華拍戲「奉旨」周旋於李彩華、盧巧音及江若琳之間仍應付自如，但原來今次對他最大困難的是扮演靚仔，笑言惟有模仿外國型男動作，從中偷師。在新片《嚦咕嚦咕對對碰》中，子華與三位不同風格的靚女結片緣，其中李彩華令他印象深刻：「合作前根本唔識，不過佢份人健談隨和，性格十三點傻傻哋咁，拍通宵戲佢可以是但喺街邊搵張床瞓，仲要瞓到擘大個口，同我好投契囉！」

讚江若琳可造之材
而盧巧音雖予人感覺冷酷，但子華覺得只要主動與她搭訕，「破冰」後的她也有玩得的一面，而子華對新人江若琳則讚口不絕：「佢成日好畀心機睇劇本，況且外表可塑性又高，每一秒我都見到佢喺度笑。」

今次可算是子華「久休復出」之作，談到角色難度，他風趣地表示今次是最大挑戰：「我講咗好多次係冇角色我做唔到嘅，不過今次扮靚仔，咪係我最大嘅挑戰囉！惟有不停留意人哋外國型男嘅姿態，偷吓師學人扮型男。（咁黃秋生咪同你遇到同一難題？）佢同我唔同，因為佢本身覺得自己真係靚仔嘛！」

子華與江若琳（左）及李彩華拍新片，「右右逢源」，羨煞不少男士。