正籌備全新廣東碟的許志安，為新歌《芝士》拍MV，請來「男神」黃子華參與演出，二人在MV中扮演保安員，不停放笑彈，用歌曲帶出正能量，為港人打氣！
知道要扮演懶惰保安員，子華未換衫埋位已經開始「入戲」，口裏一直咬着牙籤，還邊坐邊「印腳」；為滿足子華的表演慾，MV導演（樂隊RubberBand主音6號）沒有為二人安排對白，任由子華爆肚發揮。
子華爆前世欠安仔
劇情講述安仔四圍搵正在偷懶瞓覺的子華開工，因為「許志安」快要舉行活動，子華接着爆肚：「哦！陳秀文條仔嘛！」非常搞笑。
至於點解搵子華客串？安仔解釋：「今次MV導演係RubberBand嘅6號，歌詞都係佢寫，其中一句歌詞話『笑匠失蹤』，於是6號問我可唔可以搵到子華拍MV……」旁邊的子華未待安仔講完，即插嘴：「我唔係第一次幫安仔，我呢世人未試過做演唱會嘉賓，又幫佢（指安仔）做嘉賓，MV又客串埋，但我要鄭重聲明，我係唔客串，唔好搵我客串，但偏偏又幫佢客串，點解呢？我一定係前世欠咗佢，借咗五兩銀冇還到，今世要返嚟還，無可奈何到極。」
say cheese笑多點
子華畀足面，問安仔如何報答客串之恩？他說：「要食餐好，因為子華份人好嘴刁。」子華即插嘴：「即係起碼有碗雲吞麵啦！」期間工作人員問安仔可會擺結婚擺酒請子華飲？安仔語窒，子華乘勢大逼供：「你結咗婚咩？吓？佢唔答喎，我答囉，我未結婚。」
眼見近年香港人快樂指數不斷下降，安仔希望用新歌《芝士》提醒大家要經常「say cheese」笑多一點。問子華甚麼才是快樂？他一本正經說：「咩係真正開心？係你容許別人做佢開心嘅事，又容許自己做開心嘅事，咁先係開心嘅世界。」
睇安仔同子華嘅表情，就知個MV一定好好睇。
未埋位子華就擺出一個hea樣。
子華與安仔對戲，未開口已經笑爆肚。
安仔成功邀得子華演出，一定碌爆卡。
子華十分入戲。
樂隊RubberBand主音6號（左）擔任MV導演，讓二人自由發揮演出。
安仔亦不視弱，用背脊搶戲。
子華叫安仔請食雲吞麵報恩。
觀眾十分期待MV面世。