幫王維基拍劇嘅甘草演員丁主惠，前日埋怨劇組唔畀佢用替身，搞到條頸整傷。其實甘草唔受重視成日都聽到，但勢估唔到連男主角黃子華拍劇都冇替身用，仲要掉番轉幫人做替身。
噚日黃子華喺新蒲崗街頭拍無綫新劇《My盛Lady》外景，見佢32度仲要着住件超厚嘅「安全兔」毛毛衫通街走，子華平時已瘦到得排⻣，唔知再焗多幾焗，流太多汗又會瘦多幾磅，見到都覺得可憐。
問子華點解咁辛苦唔搵替身呀？佢話：「我咪替身囉，今日劇情話阿Bob呢位闊少想做善事，但又唔想自己辛苦，所以搵我幫手做佢替身，仲要拉吓車仔，其實我好多年之前都扮過麥當勞叔叔，唔好笑，都係一個表演行業嚟㗎。」

Bob自認似伊健
不過子華都有同情丁主惠，佢話：「意外好難講，好似子珊前幾日都跌親，有時冇嘢可以防備，幾時都係咁講㗎喇，香港演員有時真係搵命博，惟有自己小心啲啦」。

跌傷尾龍骨嘅子珊照着5吋高踭鞋開工，佢話仲有少少痛，但將來有乜難度動作依然會盡量親身上陣，不過：「意外嚟啫，希望佢（丁主惠）冇事，但大部份演員都會覺得自己做好啲。」而戴住個假髮嘅Bob，就話自己有啲似鄭伊健同陳可辛混合版：「個角色賤格又衰，仲係媾女王，唔知君如見到我會唔會認錯呢？」
Bob雖然忙，但仍有分身喺前日中午喺酒店幫大女霏兒舉行5歲生日會，壽星女更變身小公主，Bob噚日喺facebook搞笑留言：「噚日霏霏個生日會，應該係我人生第一個冇錢收，仲要倒貼兼埋做司儀同公關嘅活動！」

大汗叠細汗嘅子華着住白色背心打底，仲戴咗浴帽驚整亂頭髮。

黃子華喺32度幾嘅高溫仲要着厚厚嘅毛毛衫扮「安全兔」，認真惡頂。